Dünya artıq Azərbaycanın demokratiya imitasiyasına dözmək istəmir
Fuad Qəhrəmanlı: “ABŞ siyasi elitasında belə bir ab-havanın formalaşması gözlənilən seçki saxtakarlığına qarşı da bir mesajdır”
ABŞ-ın yeni səfirinin Heydər Əliyevin abidəsi önündə baş əyməsi böyük ajiotaja səbəb oldu. Səfirlik baş verəni protokol qaydası ilə izah etsə də, Qərb mediası bu olaydan bir daha Azərbaycan hakimiyyətinin mahiyyətini ifşa etmək üçün istifadə etdi.
Ümumiyyətlə, Azərbaycan hakimiyyəti ilə təmasda olan istənilən Qərb diplomatı, dövlət xadimi beynəlxalq medianın sərt tənqidinə məruz qalır. Buna misal olaraq Böyük Britaniya şahzadəsi Endryunun I.Əliyevlə görüşməsi və ya Toni Bleyerin Bakıya səfərini göstərmək olar. Hər iki şəxs bu addımlarından sonra sərt tənqidə məruz qalıblar. Və bunun fonunda Əliyev hakimiyyətinin xüsusiyyəti bir daha dünya mətbuatında ifşa olunub. Hətta Almaniya hüquq müdafiəçiləri Azərbaycan hakimiyyətinin xarici diplomatlarla əlaqəsinin araşdırılmasını təklif edirlər. Bir sıra ekspertlər Azərbaycan hakimiyyətinin Qərb diplomatları ilə görüşməsinə artıq beynəlxalq medianın həssas yanaşmasını təsadüfi saymırlar. Bundan başqa, beynəlxalq mətbuatın bu cür münasibəti seçkiyə də təsirsiz ötüşməyəcək.
AXCP sədrinin müavini Fuad Qəhrəmanlı bildirdi ki, Morninqstarın H.Əliyevin heykəli önündə təzim etməsi protokol qaydası olmasına baxmayaraq, tənqid hədəfinə çevrilməsi onu göstərir ki, beynəlxalq aləmdə Azərbaycan hakimiyyətinə sanki allergik yanaşma var. Hətta heykəl qarşısında təzim etmək ciddi tənqidə məruz qalır: “Çünki Heydər Əliyevin heykəli həm də avtoritarizmin bir simvoludur. Bu həssaslıq onu göstərir ki, Azərbaycanda avtoritarizmin adi simvoluna belə loyal, xoş münasibət qəbulolunmazdır. Bu da indiki rejimin demokratiyanı, insan haqlarını pozması ilə bağlıdır. Belə həssas yanaşma varsa, deməli, bu mövqe Azərbaycanda gedən demokratik proseslərə, o cümlədən hakimiyyətə münasibətdə daha prinsipial formada ifadə olunacaq. Qarşıdan Azərbaycanda prezident seçkilərinin gəldiyini nəzərə alsaq, demək olar, ABŞ siyasi elitasında belə bir ab-havanın formalaşması gözlənilən seçki saxtakarlığına qarşı bəri başdan bir mesajdır ki, eyni mövqe bu hadisə ilə bağlı da sərgilənəcək”.
Artıq Azərbaycan hakimiyyətinə qarşı dünyada ictimai nəzarət mexanizmi işə düşüb. Siyasətçilər, hökumətlər artıq istədikləri kimi davranmaq imkanında deyillər: “Bu bir daha göstərir ki, bundan sonra siyasətçilərin Amerika xarici siyasətinə uyğun olmayan davranışları tənqidə məruz qalacaq. Bu da Azərbaycan cəmiyyəti üçün çox mühüm faktordur. Çünki Azərbaycan cəmiyyətinin demokratiya ilə bağlı maraqları Amerika ictimai rəyində ifadə olunmaqdadır. Bu baxımdan bu olduqca ciddi, müsbət tendensiyadır”.
Xəyal