Bəzi ağzıgöyçəklər də deyir ki, hörmətli Ilham Əliyevin mütərəqqi addımlarını dəstəkləmirsiniz. Necə yəni dəstəkləmirəm? Ilham Əliyevin Korrupsiyaya qarşı mübarizə üzrə Milli Fəaliyyət Planını təsdiqləməsini dəstəkləməmək olarmı? Elmimizin fəxri, yıxıq ölkənin dayağı, məzlum xalqın arxası, çox-çox hörmətli Ramiz Mehdiyevin bu sərəncamı “Ilham Əliyevin korrupsiyaya qarşı mübarizədəki qətiyyəti” kimi qiymətləndirməsindən sonra mən nəkarəyəm ki, ağız büzəm?..
Xəbər portallarına, informasiya saytlarına baxıram: məhz Ilham Əliyevin qətiyyəti sayəsində artıq məmurların, vəzifəli şəxslərin “gəlir bəyannaməsi” verəcəkləri barədə şok xəbər adamı tir-tir titrədir, yır-yır yırğalayır. Bundan mütərəqqi, bundan layiqli sərəncam ağlımıza gəlmirdi ki, başımıza gəldi!
Nəyahət, bu xalqın qanını içən, rüşvətlə, korrupsiya ilə milyardlar toplayan məmurlar öz varidatlarını ictimaiyyətə açıqlamağa məcbur olacaqlar. Nə zarafatdır, o boyda Ilham Əliyev o yekəlikdə sərəncam verib, məmurlar kimdir ki, bəyannaməni doldurmasınlar!
Adamın başının üstündə Allah var: etiraf etməliyik ki, Ilham Əliyev hakimiyyətə gəldiyi ilk gündən korrupsiyaya qarşı mübarizə aparır. Hələ 2003-cü il dekabrın 30-da cənabımız “Korrupsiya ilə əlaqədar cinayət məsuliyyəti” və “Korrupsiya ilə əlaqədar milki-hüquqi məsuliyyət” haqqında beynəlxalq konvensiyaları təsdiqlədi.
Daha sonra qolunu çırmayan möhtərəmimiz Korrupsiyaya qarşı mübarizə üzrə Komissiyanın Əsasnaməsinə imza atdı: 2004-cü ildə isə Korrupsiyaya qarşı Mübarizə Idarəsini yaratdı ki, məhz bu Idarənin rəşadətli fəaliyyəti gözümüzün qabağındadır.
Ilham Əliyev bununla kifayətlənmədi, 2007-2011-ci illər üçün Korrupsiyaya qarşı mübarizə üzrə Milli Fəaliyyət Planını təsdiqləndi. Bu illər ərzində neçə-neçə oliqarx ictimaiyyətin qarşısına çıxıb şəffaflıq hesabatı verdi… Hətta Ilham Əliyev də öz sərəncamına hörmət əlaməti olaraq Dubayda aldığı 74 milyonluq villalarının hesabatını… açıqladı. Açıqladı?
Yox, açıqlamadı…
Dayan görüm: mətbuat yazır ki, vəzifəli şəxslərin maraqlar toqquşmasının qarşısının alınması üçün strateji plan hazırlanır, 2013-cü ildə gəlir bəyannamələri təqdim olunması üçün konkret işlər görüləcək? Bəs, “Vəzifəli şəxslərin fəaliyyətində maraqlar toqquşmasının qarşısının alınması haqqında” Azərbaycan Respublikasının Qanunu necə oldu? Bu Qanun 2004-dən qüvvəyə minib axı!
“Korrupsiyaya qarşı mübarizə haqqında” Qanun da 2004-cü il yanvarın 13-dən qüvvədədir. Həmin qanunun 5.1-ci maddəsinə görə, vəzifəli şəxslər “mənbəyini, növünü və məbləğini göstərməklə hər il öz gəlirləri barədə məlumat verməlidirlər”. Bəs, səkkiz il yarımdır qəbul olunan bu Qanuna məmurlar niyə əməl etmir? Yoxsa, liderləri Ilham Əliyevi – tövbə-tövbə… – prezident yerinə qoymurlar?
Yəqin “mənbəyini, növünü göstərməklə” hesabat vermək ayrı şeydir, “gəlir bəyannaməsi” tamam ayrı zaddır, eləmi?
“Vəzifəli şəxslər tərəfindən maliyyə xarakterli məlumatların təqdim edilməsi qaydaları” haqqında Qanunun 4-cü maddəsinə görə, “vəzifəli şəxslər maliyyə xarakterli məlumatları BƏYANNAMƏ formasında və yazılı təqdim etməlidirlər”.
Bu qanun da qəbul olunub 2005-ci il iyunun 4-də: 2006 və 2007-ci illərdə isə “əlavə və düzəlişlər etməklə” qanunu yüksək səviyyədə təkmilləşdirib, “Avropa standartlarına” uyğunlaşdırmışıq. Bəs, qət-təzə “Milli Plan”da 2013-cü il üçün hazırlanası bəyannamə nədir?
Güman edirəm ki, ruhdan düşməyə dəyməz və möhtərəmimizin sərəncamına “mız” qoymağa ehtiyac yoxdur. Bu vaxta qədərki qanunlar, konvensiyalar, korrupsiyaya qarşı Dövlət Proqramı, Milli Fəaliyyət Planı sayılmır, onlara bir “quş” qoyaq. Çünki bugünəcən Ilham Əliyev “qətiyyət ortaya qoymamışdı”, amma indi qəflətən, birdən-birə, bədahətən QƏTIYYƏT ortaya qoydu: imzaladığı, amma işləməyən bütün qanunları qətiyyətlə, cəsarətlə silib-süpürüb, bir kənara tulladı!
Əsas qətiyyətdi – onu ki ortaya qoydun, qurtardı: bir köpəyoğlunun Qanunu daha “mıqq” eləyə bilməz.
Bax, belə sərəncamlarla hər 3 ildən bir “məmurlar gəlir bəyannaməsi verəcəklər” kimi ictimaiyyətə xoş soraqlar çatdırıb, KIV-in gündəmini zəbt edən və əvvəlki sərəncamlarının “mənasız kağız parçası” olduğunu xatırladan prezidentə necə alqış deməyim? Əgər 2015-ci ilə qədər gedib çıxsa, Ilham Əliyev məmurların “gəlir bəyannaməsi” verməsi üçün daha bir “Milli Plan” təsdiqləyəcək və 2007-2011 üçün qəbul edilən Milli Fəaliyyət Planı kimi, 2012-2015 üçün seçilən Planı da bir kənara atacaq: sərəncamdır da, nə ziyanı var – qol çək, bəyan elə, at zibil qutusuna…
İlham Əliyevdən mütərəqqi addım
•
