Onur Öymənin fikrincə, AKP həqiqətən də demokratiyadan yanadırsa, o zaman Azərbaycandakı demokratiyaya niyə laqeyddir?
Türkiyənin baş naziri Rəcəb Tayyib Ərdoğanın hakim AKP-nin parlament fraksiyasının toplantısında Azərbaycanla bağlı CHP-yə ittiham irəli sürməsi gündəmin ən çox müzakirə olunan mövzusudur.
Xatırladaq ki, CHP-nin suriyalı qaçqınlarla bağlı mövqeyinə toxunan baş nazir bu partiyanın hakimiyyətdə olduğu 1945-ci ildə 146 azərbaycanlı ziyalısını güllələnmək üçün Stalin rejiminə təhvil verdiyini xatırladıb. Bu da istər Türkiyə, istərsə də Azərbaycan tarixinə acı bir xatirə olaraq yazılmışdır.
Bu günlərdə Ərdoğanın bu ittihamına o dövrdə Türkiyə prezidenti olan Ismət Inönünün nəvəsi, CXP Ankara millət vəkili Gülsün Bilgəhan cavab verib.
Gülsün Bilgəhan bildirib ki, dövlət adamı əvvəlcə öz vətəndaşının təhlükəsizliyini və milli mənafelərini müdafiə etməlidir: “1945-ci ildə soyuq müharibə şərtlərində Türkiyə beynəlxalq müqavilələrə sadiq qalaraq sərhəddən girən azərbaycanlı qaçqınları Rusiyaya təhvil vermək məcburiyyətində qalıb. Deməli, hökumət Stalinin bir sərhəd məsələsini bəhanə edib Türkiyəyə hücum etməsinin qarşısını bu şəkildə alıb”.
Mövzunu davam etdirərək CHP sədrinin müavini Onur Öymənin də fikirlərini öyrəndik. O.Öymənin qənaətincə, Ərdoğanın söylədiyi faktları tarixçilərin araşdırmasına buraxmaq lazımdır. Çünki həmin dövrdə dünyada baş verənlərə indinin siyasi baxışından yanaşmaq düzgün deyil: “Ikinci Dünya müharibəsindən sonra dünyada vəziyyət necə idi, Türkiyənin durumu necə idi? Bütün bunları diqqətlə incələmək lazımdır. O zaman SSRI-nin Türkiyəyə qarşı torpaq iddiası da var idi. O zaman NATO yox idi. ABŞ öz problemi ilə bərabər idi”.
O.Öymən bir məqama da diqqət çəkməyin tərəfdarıdır. O bildirdi ki, həmin dövrdə azərbaycanlılar da Rusiyaya öz vətəndaşlarını geri almaq üçün kazakları və digər müsəlmanları təslim ediblər: “Ona görə də tarixi hadisələri bu günün siyasi koşulları baxımından dəyərləndirməmək lazım. Bu gün siyasi partiyalar tarix üzərindən mübahisələrə girərlərsə, o zaman kimin qazanıb, kimin uduzduğunu müəyyən edə bilməzsən. Hər ölkənin tarixində üzücü və sevindirici olaylar olub”.
O.Öyməndən daha bir sualımız Türkiyənin hazırkı hökumətinin Azərbaycandakı demokratikləşməyə etinasız yanaşmasının səbəbləri ilə bağlı oldu. CHP sədrinin müavini bildirdi ki, AKP həqiqətən də demokratiyanın dünya üzrə qorunmasında maraqlıdırsa, o zaman bütün dünyada, xüsusilə Türkiyəyə həssas olan regionlarda demokratikləşməyə önəm verməlidir: “Demokratiyanın dəstəklənməsi təkcə Suriya ilə yekunlaşmamalıdır. Əgər AKP həqiqətən də demokratiyadan yanadırsa, o zaman Səudiyyə Ərəbistanında, Qafqazlarda, Orta Asiyadakı demokratikləşmə ilə bağlı niyə mövqe bildirilmir? Bir ölkə üçün demokratiyanın istənilməsi, digərləri üçün istənilməməsi yanlışdır”.
Xəyal
