Hüquq müdafiəçisinin səhhətində problemlər var

“Vidadi İsgəndərli şəkər xəstəliyindən, qan təzyiqindən, ürək-damar sistemində oksigen çatışmazlığından əziyyət çəkir”

14 saylı cəza çəkmə müəssisəsində məhbus həyatı yaşayan, hüquq müdafiəçisi Vidadi Isgəndərliylə ötən gün qardaşı, hüquq müdafiəçisi Oqtay Isgəndərli görüşüb.
Bu barədə “Azadlıq”a məlumatı hüquq müdafiəçisi özü verib. Onun sözlərinə görə, Vidadi Isgəndərlinin səhətində problemlər var: “Vidadi şəkər xəstəliyindən, qan təzyiqindən, ürək-damar sistemində oksigen çatışmazlığından əziyyət çəkir. Şəkər xəstəliyi xüsusi qayğı və ciddi qida rejimi tələb edən xəstəlikdir. Buna isə həbsxana şəraiti imkan vermir. Istənilən vaxt qanda şəkərin miqdarının normadan yüksək səviyyəyə qalxmaq təhlükəsi yarana bilər. Qanunsuz həbs, saxta ittihamlar və sifarişli məhkəmə hökmü əsəb-sinir sistemlərinə ciddi təsir edib. Həbsxananin ekoloji fəlakət zonasında yerləşməsi bütün xəstəliklərin daha da artması üçün münbit şərait yaradır. Vidadi bəy ona qarşı bu cür addımların təsadüfü deyil, düşünülmüş şəkildə həyata keçirildiyini bildirdi”.
Oqtay Isgəndərli deyir ki, Vidadi Isgəndərlinin hələ ötən il məhkəmə prosesi gedərkən hakimiyyət nümayəndələri ona bildiriblər ki, məhkəmədən sonra səni ən dəhşətli cəzaçəkmə müəsisəsinə göndərəcəyik: “Ona deyiblər ki, nə vaxt mübarizədən əl çəksən, demokrtaiya, azad söz dilindən düşsə, sənin yerini dəyişəcəyik. Ancaq Vidadi bəy öz mövqeyindən, mübarizəsindən bir addım da geri çəkilməyib. Təzyiqlərə baxmayaraq hüquq müdafiəçisinin əhval-ruhiyyəsi əvvəlkindən mübarizdir”.

Ramin DEKO