“İçində vətəndaşlıq mövqeyi gəzdirən hər kəs azad sözün daşıyıcısı kimi, “Azadlıq” qəzetinin yanında dayanmalıdır!”
Görkəmli ictimai xadim, professor Cəmil Həsənli “Azadlıq” qəzetinə dəstək kampaniyasına qoşularaq, xalqa müraciət edib. Müraciətdə deyilir:
Azərbaycan mətbuat tarixində öz yeri olan “Azadlıq” qəzetinin bu gün yaşadıqlarını mən həyəcanla izləyirəm. “Azadlıq”ın bu böhranlı vəziyyəti onun təbii taleyi deyil, azad söz əleyhdarlarının qərəzli yanaşmasının nəticəsidir. Azad mətbuatın sonuncu nümunələrindən biri kimi, “Azadlıq” qəzetinin indiki ağır duruma düşməsi heç şübhəsiz ki, ölkədə azad söz daşıyıcılarına qarşı aparılan siyasətin məntiqi yekunudur. Bu gün ölkəmizdə sözü azad etməyə çox böyük ehtiyac vardır və əslində, “Azadlıq” məhz bu missiyanı yerinə yetirir. Ona görə də “Azadlıq”a münasibət azad sözə münasibətdir.
“Azadlıq” qəzeti çağdaş milli mətbuatımızın ilk qaranquşu olmaqla, Azərbaycanın müstəqilliyinin, istiqlalının əldə olunmasında misilsiz xidmətlər göstərmişdir. 1989-cu ilin böhranlı dekabr günlərində əsası qoyulan bu qəzet çağdaş milli müstəqilliyimiz uğrunda mübarizənin önündə getmiş, milyonları bu mübarizənin ardıcılına çevirmişdi.
“Azadlıq” azsaylı mətbuat oqranlarındandır ki, heç zaman prinsipial tənqidi mövqeyindən geri çəkilməyib. Hətta “Azadlıq” çiyindaşlarının hakimiyyətdə olduğu dönəmlərdə də (1992-93) öz xarakterini qorudu; vətəndaşların və peşəkar medianın mənafelərini güdərək, yandaş mətbuata çevrilmədi.
Uzun illərdir “Azadlıq” qəzeti ağır şərtlər altında varlığını sürdürür və bu, təkcə mövcudluğu qorumaq deyil: “Azadlıq” yenə də amansız repressiya maşını ilə döyüşdə ön sıradadır, ləyaqətlə azad sözün qorunması uğrunda mübarizəyə, ölkənin demokratikləşməsinə öz töhfəsini verir.
“Azadlıq” bu ağır illər ərzində sözün tam mənasında qurbanlar vermiş qəzetdir. Təkcə həqiqətləri dediyinə görə qəzetin döyülməyən, təhqir olunmayan əməkdaşı qalmayıb. Qəzetin əməkdaşları həbsxanaya salınıb, mühacirətə getmək məcburiyyətində qalıb. Mən həbs edilmiş, müxtəlif dövrlərdə mühakimə olunmuş “Azadlıq”çıların demək olar ki, hamısının məhkəmə proseslərində iştirak etmişəm. Onların necə ləyaqətsiz üsullarla həbs edilmələrinin şahidi olmuşam.
Əlbəttə, qəzetin səhifələrində gedən yazılarla razılaşmadığım məqamlar da olub. Lakin bu, əsas vermir ki, Azərbaycan mətbuatının, azad sözün ənənələrini yaşadan bir mətbuat orqanını müdafiəsiz qoyaq.
İndi təkcə “Azadlıq” deyil, ölkənin müqəddəratını düşünən hər kəs ciddi sınaq qarşısındadır. Biz ya irticanın “Azadlıq” üzərindəki qələbəsinə sakitcə tamaşa etməli və beləcə, ölkədə qəbiristanlıq sükutunun yaradılmasıyla razılaşmalıyıq, ya da vətəndaş mövqeyi göstərib, qəzetin fəaliyyətinin dayanmaması üçün öz köməyimizi əsirgəməməliyik. Mən hesab edirəm ki, bu sınaq məqamında içində vətəndaşlıq mövqeyi gəzdirən hər kəs azad sözün daşıyıcısı kimi, “Azadlıq” qəzetinin yanında dayanmalıdır!
