Neftin qiyməti 50 dollara düşə bilər

Avrozonada müşahidə olunan böhran dərinləşərsə, neftin dünya bazarında qiyməti 2 dəfə azala bilər. “The Telegraph”ın yazdığına görə, bunu Isveçrənin aparıcı banklarından olan “Credit Suisse” bildirib.
Bankın ekspertləri hesab edirlər ki, etimad böhranı nəticəsində neftə tələbat kəskin azala və “Brent” markalı neftin qiyməti 50 dollara enə bilər. Qeyd edək ki, ötən həftə “CIBC World Markets”in ekspertləri indiki iqtisadi vəziyyət davam edərsə, WTI markalı neftin qiymətinin 70 dollara düşəcəyi barədə proqnoz veriblər. Hazırda isə WTI neftinin 1 barreli 82-83 dollara satılır.
“Religare Capital Markets”in mütəxəssisləri isə WTI markalı neftin 80 dollara, “Brent” neftinin isə 90 dollaradək ucuzlaşacağını proqnozlaşdırırlar. Bu ilin may ayında neft 20% ucuzlaşıb. Qeyd edək ki, Azərbaycanın “Azeri Light” markalı nefti bir qayda olaraq “Brent” neftindən təqribən 2-3 dollar baha satılır.