«Hüquq Müdafiəçilərinin Mühafizəsinə Beynəlxalq Nəzarət» təşkilatı bəyanat verdi
“Hüquq Müdafiəçilərinin Mühafizəsinə Beynəlxalq Nəzarət» (HMMBN) – Insan Haqları üzrə Beynəlxalq Federasiya və Işgəncələr Əleyhinə Ümumdünya Təşkilatının birgə proqramı – aprelin 26-da Azərbaycan vətəndaş cəmiyyətinin fəalı Oqtay Gülalıyevin həbsi ilə əlaqədar bəyanatla çıxış edib.
Azərbaycan Hüquq Müdafiəsi Mərkəzinin rəhbəri Eldar Zeynalovun “Turan”a verdiyi sənəddə Gülalıyevin işinin mahiyyəti və aprelin 8–də Sabirabad rayonunun Minbaşı kəndində həbsinin təfərrüatı, polis və iqtidarın ona qarşı «Kütləvi iğtişaşlara çağırış» maddəsi üzrə cinayət işinin qaldırılması ilə bağlı sonrakı fəaliyyəti şərh edilir.
Bəyanatda Gülalıyevi polis idarəsində şöbə rəisinin müavini Rauf Məcidovun döydyü, həmçinin iqtidarın onu müstəqil vəkillə təmin etmədiyi, iqtidarın təyin etdiyi vəkilin isə Gülalıyevin fiziki təzyiqlərə məruz qaldığını ictimaiyyətdən gizlətdiyi vurğulanır.
«Hüquq Müdafiəçilərinin Mühafizəsinə Beynəlxalq Nəzarət» Gülalıyevin həbs və təqibələrə məruz qalması, həmçinin ona qarşı fiziki zorakılığın tətbiq edilməsi ilə əlaqədar dərin narahatlıq keçirdiyini bildirir. Aydındır ki, bu addımlar nəinki onun hüquqlarının pozulması, həm də onun korrupsiya faktlarının monitorinqi və sosial ədalət uğrunda mübarizə sahəsində apardığı fəaliyyətinin dayandırılması deməkdir», – deyə bəyanatda qeyd edilir.
Hüquq müdafiəçisinin təqiblərə məruz qalması ilə əlaqədar olaraq HMMBN beynəlxalq birliyi Azərbaycan hakimiyyətindən tələb edir: “Oqtay Gülalıyevin, həmçinin Azərbaycanın bütün hüquq müdafiəçilərinin fiziki və psixoloji təhlükəsizliyinə zəmanət vermək; Gülalıyevi dərhal azad etmək; Gülalıyevin və Azərbaycanda digər hüquq müdafiəçilərinin təqib olunması təcrübəsinə son qoymaq; ona qarşı zorakılıq işlədilməsi faktını araşdırmaq və bunda müqəssir olanları cəzalandırmaq”.
«Hüquq Müdafiəçilərinin Mühafizəsinə Beynəlxalq Nəzarət» həmçinin BMT-nin Insan Haqları üzrə Ümumi Bəyannaməsinin müddəalarının icrasını və insan haqları və azadlıqları üzrə bütün standart və normaların Azərbaycanda tətbiqinin təmin olunmasını tələb edir.
