Məqsəd Azərbaycanda ifadə və toplaşma azadlığının vəziyyətini dünyaya olduğu kimi çatdırmaqdır
“Amnesty International” beynəlxalq insan haqlarını müdafiə təşkilatı aprelin 2-də Azərbaycanda ifadə azadlığı ilə bağlı iki kampaniya başladacağını bildirib. Onlardan biri “İnteraktiv Brifinq”, digəri isə “Twitter” kampaniyasıdır. Təşkilatın Azərbaycan üzrə koordinatoru Maks Taker “Amerikanın səsi” radiosuna müsahibəsində “Eurovision” musiqi yarışmasının bəzi keçmiş iştirakçılarının da iştirak edəcəyi kampaniya barədə məlumat verib. Müsahibəni qısa ixtiraslra təqdim edirik.
– Aldığımız məlumata görə, “Amnesty International” aprelin 2-də iki kampaniyaya başlayacaq. Bu kampaniyalar barədə bir qədər ətraflı məlumat verə bilərsiniz?
– Bunlardan biri “İnteraktiv brifinq”, digəri isə “Twitter” kampaniyasıdır. Birinci kampaniya “Eurovision”-un keçmiş iştirakçıları və başqa populyar musiqiçilərin köməkliyi ilə Azərbaycanda insanların ifadə və toplaşmaq azadlığının vəziyyətini dünyaya olduğu kimi çatdırmaqdan ibarətdir. Yeni bir interaktiv səhifə yaradılacaq. Orada izləyicilər videolara, fotolara baxa və dinc nümayişlərə və onlayn fəaliyyətlərinə görə həbs edilənlərin prosesləri barədə məlumatları oxuya biləcəklər. Bu kampaniyaya izləyicilər də “Twitter” vasitəsilə qoşula bilər. İkinci kampaniyamız da məhz bundan ibarətdir. Onlar “Twitter” vasitəsilə təşkilatçı Avropa Yayımları Birliyini bu dinc nümayişçilərin azadlığa buraxılması üçün Azərbaycan hökumətinə daha çox təzyiq göstərməyə çağıran mesajlar yaya bilər.
– Haqqında danışdığınız birinci kampaniya – İnteraktiv brifinq kampaniyası hansı veb səhifədə aparılacaq. Bunun üçün yeni veb səhifə yaradılacaq?
– Bu səhifə “Amnesty International”ın öz səhifəsi daxilində yaradılacaq. Bu bölmə hətta “Amnesty Internatinal”ın Avropadakı 11 ofisinin veb səhifələrində də müxtəlif dillərdə yerləşdiriləcək.
– Açıqlamada Avropa Yayımları Birliyini Azərbaycana daha çox təzyiq göstərməyə çağıracağınız deyilir. Onlardan gözləntiləriniz nədir? Onlar bu istiqamətdə nə kimi addımlar ata bilər?
– Azərbaycan “Eurovision” müsabiqəsinin uğurlu olmasını həqiqətən də istəyir. Bu baxımdan Avropa Yayımları Birliyinin böyük imkanı var. Birlik hökumətdən açıq şəkildə istəyə bilər ki, onlar ifadə azadlığını yalnız müsabiqəni işıqlandıracaq xarici jurnalist üçün deyil, həm də orada yaşayan sadə azərbaycanlılar üçün təmin etsin. Bu addımın bir hissəsi isə keçən ildən həbsdə olan vicdan məhbuslarının azadlığa buraxılması ola bilər. Ona görə də biz AYB-ni Azərbaycandakı dinc nümayişçilər və ifadə azadlığı tələb edənlərə qarşı təzyiqləri ictimaiyyət qarşısında tənqid etməyə çağıracağıq.
– Kampaniyalar nə qədər davam edəcək?
– Hər iki kampaniya aprelin 2-də – ötən ilin yazında dinc nümayişçilərin həbs edilməsinin ildönümü günü başlanacaq. “Twitter” kampaniyası təxminən 1 həftə davam edəcək. İnteraktiv veb bölmə isə “Eurovision” müsabiqəsinin keçiriləcəyi vaxtadək mövcud olacaq. Bir qrup tanınmış musiqiçi bu kampaniyada iştirak üçün qeydiyyatdan keçib və digər musiqiçiləri də bu kampaniyaya qoşulmağa çağıracağıq.
