Leon Panetta: ”İsrail İrana hücum edərək bizi vaxtından əvvəl müharibəyə məcbur edir”
Amerikanın Müdafiə Naziri Leon Panetta hərbçilər qarşısında çıxış edərkən bildirib ki, İsrail tərəfinin İranın nüvə obyektlərinə vaxtından əvvəl zərbə endirmək istəyi Vaşinqtonu hərbi münqişəyə qoşulmağa məcbur edəcək. Panetta Obama hökümətinin İrana qarşı hansı mövqedə olması ilə bağlı suala aydınlıq gətirməyib. Daha sonra Pentaqonun mətbuat katibi Karl Vuq dəqiqləşdirib ki, ABŞ diplomatik danışıqların və İrana beynəlxalq təzyiqin tərəfdarıdır. Ancaq hadisələrin istənilən gedişatına hazır olduqlarını bildiriblər. Panetta Konqresin hərbi büdcəni 50 milyard dollar ixtisara salmaq qərarını “məsuliyyətsizlik” adlandırıb. İran haqda daha bir mövqeni ABŞ Dövlət Katibi Hillari Klinton bildirib. O, Fars körfəzi ölkələrinə İrana qarşı regional raket hücumundan müdafiə sistemi yaratmağı təklif edib. Ər-Riyadda Körfəz ölkələrinin xarici işlər nazirləri ilə keçirilən görüşdə xanım Klinton “ümumi strateji porblemləri həllində və İranın nüvə təhlükəsinin qarşısının alınmasında” ABŞ-ın köməkçi ola biləcəyini təklif edib.
ABŞ-ın regional HHM sistemi yaratmaq bəyanatı ilk deyil. Bu həftə ABŞ Şimali Koreya təhlükəsinə qarşı Sakit okean hövzəsində raket bazaları qurmaq istəyini bildirmişdi. Bunun üçün Cənubi Koreya, Yaponiya və Avstraliya ilə danışıqlar aparılır.
azadliq.info
