Sankt-Peterburqda Azərbaycan diaspor təşkilatının konsert təşkil etməsi etirazla qarşılandı
Sankt-Peterburqda fəaliyyət göstərən Azərbaycanlıların Milli-Mədəni Muxtariyyəti adlı təşkilatın bu il fevralın 27-də konsert keçirməsi etirazla qarşılanıb. Beynəlxalq Diaspor Mərkəzi Xocalı Soyqırımını Tanıtım Ictimai Birliyi və bir sıra digər təşkilatlar dünyanın hər yerində Azərbaycan diasporunun Xocalının anım tədbirləri keçirdiyi vaxtda Sankt-Peterburqdakı diaspor nümayəndələrinin konsert şənliyi təşkil etməsindən hiddətləniblər.
Konsertin təşkilatçısı Vaqif Məmişov APA-ya açıqlamasında belə bir tədbirin keçiriləcəyini təsdiqləyib:”Birincisi, burada 380 min azərbaycanlı yaşayır. Ikincisi, Xocalı faciəsi fevralın 25-dən 26-a keçən gecə baş verib, 27-də yox ki! Biz də hər il fevralın 25-26-da bu hadisəni bir yerdə yığışıb yada salırıq. Bu il də yığışıb yada salarıq”.
V.Məmişov onların ünvanına səslənən ittihamları əsassız adlandırıb:”20 yanvar faciəsindən sonra ayın 21-də Azərbaycanda da konsert olur. Bizim burada fevralın 27-də keçirəcəyimiz konsert Rusiyada prezident seçkilərinə dəstək konsertidir. Burada gün seçmək bizdən asılı olmadı. Sankt Peterbuqrdakı 12 min nəfərlik sarayda yalnız ayın 27-də boş yer var”.
Qeyd edək ki, həmin konsertdə iştirak etmək üçün Azərbaycandan müğənnilər Eyyub Yaqubov, Rəhim Rəhimli, Sevda Yəhyayevə, Namiq Qaraçuxurlu, Ibrahim Borçalı, Rəfael və Coşqun dəvət olunublar.
Azərbaycan qeyri-hökumət təşkilatları bununla bağlı bu il fevralın 20-də Xocalı faciəsinin şahidləri, Qarabağ veteranları, şəhid ailələri, QHT nümayəndələri və sənətçilərin iştirakı ilə etiraz tədbiri keçirəcəklər.
