Gənc ailənin ölüm səbəbləri «Azadlıq»da
Bu, Moskva prospekti 82-dəki binada dəm qazından baş verən beşinci faciədir…
Ərazini ağı səsi bürümüşdü… Hamı göz yaşları içində idi… Söhbət faciəvi şəkildə dünyasını dəyişmiş Ibrahim Şabanov və Şəhla Hacıyevanın ailəli olduqları üç gün ərzində yaşadıqları binanın həyətində baş verənlərdən gedir.
Ibrahim və Şəhla noyabrın 12-də ailə qurmuşdu. Gənclər üç günlük ailə həyatını Moskva prospekti 82 ünvanındakı 33 saylı mənzildə yaşayıb. Mənzili də ailə qurmamışdan bir neçə gün əvvəl alıbmışlar…
Təcili Tibbi Yardım Stansiyasının maşını da ərazidə idi. Çünki mərhumların yaxınları arasında huşunu itirənlər, səhhəti pisləşənlərin sayı çox idi.
Qeyd edək ki, Ibrahimin 25, Şəhlanın 18 yaşı vardı. Bəy evin tək övladı, gəlin isə evin tək qızı idi. Ibrahim valideynlərilə Rusiyada işləyirdi. Toy olandan sonra valideynləri Bakını tərk edib, gənc ailə də bir müddət sonra gedəcəkmiş…
Faciə noyabrın 16-da baş verib. Ilkin rəyə görə, gənclər gecə saat 3-4 radələrində dəm qazından boğulublar. Ancaq heç kim dəqiq heç nə bilmir. Hətta qonşular belə, heç nə hiss eləməyiblər. Hadisə baş verən gün Ibrahimin xalası Iradə xanım onlara baş çəkməyə gəlib. Qapını nə qədər döysə də, heç bir xeyri olmayıb. Sonda qapının məhəccərini sındırıb içəri keçməyə nail olublar. Və hər iki gəncin yataqda vəfat etdiyini görüb. Mərhum gənclər qazı açıq qoyub yatıblarmış… Iran sobası onların həyatına son qoyub…
Qonşularla da söhbət etdik. Onlardan öyrəndik ki, bu, həmin binada dəm qazından baş verən beşinci faciədir. Faciə nəticəsində ölənlərin əksəriyyəti də gənclərdir…
Ibrahimin valideynləri hadisədən gec xəbər tutduğundan həmin gün – noyabrın 16-da Bakıya gələ bilməyiblər. Ibrahimin dayısı isə bunları deyir: “Olan olub artıq… Daha heç nə ələ gələn deyil…”
Iki gəncin cənazəsini evdən çıxarırlar… Ayaqyalın, başıaçıq iki qadın cənazənin üstünə yeriyir… Hərəsi bir cənazənin üstündə ağı deyir. Ibrahimin anası oğlunun, Şəhlanın anası qızının – “Niyə bizi bədbəxt elədiniz bizi?..”
Hadisə baş verən gün gəncləri “morqa” aparıblar. Dünən axşam saatlarında isə onları torpağa tapşırdılar.
Ramin DEKO
