Mübarəkə lobbiçilik etmiş şirkət Azərbaycan iqtidarını necə pis vəziyyətə salıb?
“Biz konkret rejimlərin deyil, ölkələrin maraqlarının müdafiəsinə lobbiçilik edirik”
“Bu yaz Afrika və Yaxın Şərqin diktatorlarını hədəf almış ərəb inqilabları dalğası Azərbaycan hakimiyyətini Vaşinqtonda lobbi saxlamaq siyasətindən çəkinməyə vadar edib. Belə ki, Bakı son vaxtlar bu işə demək olar ki, qəpik-quruş ayırır”. Bunu Vaşinqtonun lobbi bazarına yaxından bələd olan mənbə “Turan”ın müxbirinə bildirib.
“Problem ondadır ki, Azərbaycan rəhbərliyindəki şəxslər əvvəldən ABŞ lobbiçilərinin əhəmiyyətini yanlış interpretasiya edirdilər. Biz konkret rejimlərin deyil, ölkələrin maraqlarının müdafiəsinə lobbiçilik edirik”, – deyə mənbə vurğulayıb.
“Köhnə dostları” Misir inqilabı “yedi”
Luiziananın sabiq konqresmeni Bob Livinqstonun baçşılıq etdiyi The Livingston Group 2008-2009-cu illərdə Azərbaycanla bir neçə lobbiçilik müqaviləsi bağlamışdı və bu barədə Bakı mətbuatı dəfələrlə yazıb. Livinqstonçular həm də 3 il idi ki, ABŞ paytaxtında Misirin Mübarək rejiminin lobbiçiliyini həyata keçirirdilər. Bu iş üçün Mübarək onlarla və digər bir neçə sabiq konqressmenlə ildə $1.1 milyonluq müqavilə bağlamışdı.
Misirdəki hakimiyyət dəyişikliyindən sonra Livinqstonun bu ölkəyə lobbiçiliyini davam etdirib-etdirmədiyi hələ tam məlum olmasa da, (2001-ci ildə lobbi təşkilatları ilə bağlanmış maliyyə müqavilələri üzrə hesabat gələn ilin əvvəlində açıqlanacaq) bir şey məlumdur ki, Azərbaycan artlıq bu şirkətlə əməkdaşlığını kəskin şəkildə azaldıb.
“Təzə dostlara” pul xərcəlməyə həvəs yoxdur
ABŞ Ədliyyə Departamentinin sənədlərinə əsasən, son aylar ərzində Azərbaycan hakimiyyəti yalnız Vaşinqtonun mərkəzindəki Patton Boggs şirkəti ilə uzunmüddətli lobbiçilik müqaviləsi imzalayıb ki, onun da dəyəri ayda cəmi 35 min dollardır (ildə təxminən 400 min).
Müqayisə üçün, təkcə 2008-2009-cu illərdə Azərbaycan Vaşinqtonda lobbiçilyə 1,3 milyon dollardan artıq vəsait xərcləmişdi.
ABŞ-Azərbaycan münasibətlərində soyuqluğun hökm sürdüyü 2009-2010-cu illərdə isə Azərbaycan hökuməti Vaşinqtonda lobbisiz keçinib.
Ədliyyə Departamentindəki qeydlərdə Patton Boggs-un Bakı ilə əməkdaşlığının konkret detallarına rast gəlinməsə də, şirkət öz saytında Azərbaycan rəsmilərinin bir sıra konqresmenlərlə görüşü, ötən ay XİN başçısı Elmar Məmmədyarovun səfəri və digər hadisələri qeyd edir.
Heydər Əliyevə ad günləri və Fərhad Əliyevə qarşı kampaniya
“Azərbaycanla müqayisədə Dağlıq Qarabağ erməniləri Vaşinqtonda daha güclü lobbi dəstəyi ilə təmsil olunurlar”, – deyə mənbə vurğulayıb. Belə ki, onların maraqlarını güclü erməni diasporu və Konqresdəki nümayəndələri müdafiə edir.
Əvvəlki illərdə Azərbaycan Vaşinqton lobbiçilərini Qarabağ münaqişəsinə qismən cəlb edirdi. Məsələn, 2009-cu ildə bir neçə konqresmen Livinqston Qrupunun səyləri nəticəsində Xocalı hadisələrini pisləyən bəyanatlar yaymışdılar. Amma ümumilikdə, Azərbaycan bu şirkətin xidmətlərindən daha çox hakim ailənin maraqları naminə – sabiq prezident Heydər Əliyevin ad gününün ABŞ şəhərlərində qeyd olunması, keçmiş nazir Fərhad Əliyev və onun qardaşının azad olunmasına dair Konqresdəki çağırıışların ört-basdır edilməsi və bu kimi fəaliyyətlərdə bəhrələnməyə çalışıb.
***
“Lobbiçiliyin əhəmiyyəti Bakıda düzgün anlaşılsa, Azərbaycan xalqı nəinki bu işdən bəhrələnə, hətta bu işə sərf olunan pulları başqa yollarla geri ala bilər. Məsələn, məhz lobbinin səyləri nəticəsində Misir rejimi hər il Konqresdən 1,3 milyard hərbi yardım almağa nail ola bilirdi – yəni, bu iş üçün xərclədiyi vəsaitdən 10 dəfə artıq götürürdü”, – deyə mənbə bildirib.
