Mən günün birində bu hakimiyyətdəkilərin hansı birindən normal, ağıllı bir açıqlama eşitsəm, burdan hər kəsə söz verirəm: həmin gün çıxıb “Tarqovı”da iki ağız anqıracam. Sözünün arxasından qaçan namərddir. Sözünü tutmayan Mübariz Əhmədoğlundan betər olsun!
***
Yazıya belə “qazlı” başladığım üçün yəqin bağışlayarsınız. Amma mən Dövlət Statistika Komitəsinin sədri Arif Vəliyevin dünənki açıqlamasını oxuyandan sonra oturub ciddi-ciddi düşündüm: belə zəka sahibi, ağıl-kamal yiyəsi nazirləri, komitə sədrlərini Allah düşmən başına da gətirməsin! Görün qosqoca bir məmləkəti kimlər idarə edir, uğruna can verdiyimiz, qanlar tökdüyümüz müstəqilliyin meyvələrini kimlər dadır: savadı hətta ibtidai sinif şagirdlərinin yanında belə, sıfırda qalanlar! Nəfəsi belə, yalanla gedib gələnlər, amma yalan söyləməyi də doğru-dürüst bacarmayanlar!Yazıq sənə, Azərbaycan…Yazıq sənə!
***
Bəs Arif Vəliyevin adamı bu qədər cin atına mindirəcək, insana, türkün sözü, “pes vallahi!” dedirdəcək açıqlamasında nələr var? Sitat: “Gizli iqtisadiyyatı gözlə görmək mümkün deyil. Tutaq ki, ev şəraitində yağ, pendir, şərab istehsal edirlər, yaxud mal-qara kəsilib satılır. Bunu görmək mümkün olmur”.
Yəni anlayacağınız, komitə sədri demək istəyir ki, Azərbaycan insanı həyət-bacasındakı toyuğu kəsib yeyərkən, onun yumurtasından qayğanaq bişirərkən hökumətə hesabat verməlidir, əks halda ölkədə gizli iqtisadiyyatın real çəkisini müəyyənləşdirmək mümkün olmur. Bir az da açıqlayım: Arif Vəliyevin ağlınca, Azərbaycanda gizli iqtisadiyyatla xalq özü məşğuldur, çünki düzəltdiyi pendiri, yağı, çəkdiyi başıxamırlı tut arağını hökumətdən gizlədir.
***
Mən bu cür səfeh açıqlamanın müəllifindən əlbəttə ki, gəlir deklarasiyalarını gizlədən oliqarxları tənbeh etməsini gözləmirəm.Mən ondan dövlətin cibindən gizli-aşkar nə qədər pulun oğurlandığını hesablamasını da istəmirəm.
Mən ondan heç gizli və çirkli pulların havada uçuşduğu tikinti şirkətlərinin, eşşək boyda supermarketlərin, şadlıq evlərinin, daha nələrin, nələrin arxasındakı iribuynuzlu məmurlara güldən ağır söz deməsini də gözləmirəm.
Amma mən onun, ən azı xalqa qarşı bir az sayğılı olmasını istəyə bilərəm axı. Bir halda ki, büdcədən hər gün, hər saat, hər saniyə nə qədər oğurlandığını hesablaya bilmirsən, bir halda ki, oliqarxların çirkli yollarla qazandığını hesablaya bilmirsən, heç olmasa, xalqın toyuqlarının dalını da güdməyə bilərsən axı. Eşşəyə gücün çatmır, palanı da döyməyə bilərsən axı.
Niyə yaptokratların ölkədə, az qala hər şeyə əl qoyması, yumurtadan belə, yun qırxması, dəvədən “qığ” oğurlaması, bütün bunların hesabını isə verməməsi gizli iqtisadiyyat deyil, amma mən kraldan xəbərsiz yumurta yeyirəmsə, bu artıq gizli iqtisadiyyatdır? Hansı məntiqdir bu? Buraxın məntiqi-zadı, hansı əxlaqdır bu?
***
Açığı, Arif Vəliyevin söylədiklərini ciddi-ciddi şərh etməyə də dəyməz. Problem onun dedikləri deyil. Problem ölkədə olan hakim zehniyyətdir. Hansı ki, “Statkom” sədrinin sözləri ilə növbəti dəfə təcəlla etmişdir!
Bu zehniyyətə görə, onlar sudan çıxmış ağ qaşıqdırlar. Aydan arı, sudan durudurlar. Imam övladıdırlar. Əvəzində ölkədəki bütün pisliklərin tək suçlusu varsa, o da xalqdır. Rüşvətin tüğyan etməsini xalqın boynuna qoymuşdular, “xalq rüşvət verməsin, biz də almayaq” demişdilər… Demokratik dəyişikliklərin yubanmasını xalqın ayağına yazmışdılar, “bizdən olsa çoxdan burda ”ikinci Norveç” düzəltmişdik, amma xalq demokratiyaya hazır deyil” demişdilər… Indi də çıxıb xalqı gizli iqtisadiyyatda günahlandırırlar. Ki, zatən bundan sonra şalvarımızın altına qoyduqları kameraları çıxarıb toyuqlarımızın dalına yerləşdirmələrini də gözləməyə dəyər.
Bəs necə, onların gündə neçəsinin yumurtladığını öyrənmədən ölkədə gizli iqtisadiyyatın çəkisini necə müəyyənləşdirmək olar? Xalq hakimiyyətdən gizli qayğanaq yedikcə, iqtisadiyyatımız necə şəffaflığa qovuşar, necə çıxar qaranlıqlar aydınlığa?
***
Yazıq sənə, Azərbaycan?Yazıq sənə!
