Kral həzrətlərinin Şüvəlan qəsəbəsində “sakinlərlə görüş”də dediklərini təbəssümsüz oxumaq mümkün deyil. Sitat: “Görülən işlərə mütləq nəzarət olunmalıdır. Ictimai nəzarət və əhali tərəfindən nəzarət”.
Bəh, bəh, bəh! Necə də gözəl səslənir: “Ictimai nəzarət”. Hansı ki, bizdə onun haqqında yalnız keçmiş zamanda danışmaq mümkündür.Ictimai nəzarəti yerinə yetirməli olan KIV, məsələn. Ya pulla, ya zorla susdurulub. Müstəqil, alternativ düşüncəli yazarlar həbsxanalara atılıb, sürgün edilib. Ölkədə iki-üç qəzetdən başqa faktiki olaraq tənqidçi media yoxdur.
Ölkədəki QHT-lərin 95 faizi ya vəlvələdən, ya zəlzələdən “Q” hərfindən yerli-dibli imtina edib, faktiki olaraq hökumət təşkilatlarına çevrilib.Bütün televiziya və radiolar hakimiyyətin nəzarətindədir, yalan və yaltaqlıqla məşğuldur.
Partiyalardan ümumiyyətlə, danışmağa dəyməz, onlar rejim üçün “altıncı barmaq” kimidir, nə kəsib ata bilirlər, nə də saxlaya.Ictimai fəallarla bağlı isə artıq hər şey aydındır, bu saat ölkə həbsxanaları onlarla doludur.
Indi kral həzrətləri zəhmət çəkib deyə bilərmi: bundan sonra ictimai nəzarəti kim həyata keçirməlidir? Necə həyata keçirməlidir? Bəlkə Bəxtiyar Hacıyev həbsxanadan Bakı-Şamaxı yoluna lağım atmalı, gəlib orada asfaltın necə çəkildiyini müəyyənləşdirməlidir?
“Əhali tərəfindən nəzarət” isə ümumiyyətlə, nə olan şeydirsə, hər halda biz bu barədə ilk dəfə eşidirik. Belə çıxır, camaat işini-gücünü atıb Kəmaləddin Heydərovu güdməlidir ki, “Jalə” şirəsini damla-damla toplayıb, ya yox? Bəlkə bundan sonra xalq gedib Ziya Məmmədovun tikdiyi körpülərin yanında yatmalıdır ki, görsün, onlar nə qədər keyfiyyətli inşa olunur? Mən hansısa yol çəkiləndən bir ay sonra çökməsin deyə neyləməliyəm, əvvəlcə gedib aylarla asfaltçəkənin çənəsinin altını kəsdirməliyəm? Bunlar tamahına nəzarət eləyə bilmir deyə, gedib tikdikləri xəstəxanada, məktəbdə kərpicmi saymalıyıq, sement kisələrimi saymalıyıq? Belə məntiq varmı, belə idarəçilik varmı, allah eşqinə, biri çıxıb söyləsin.
Axı dünyanın harasında görülən işlərə bütün xalq yığılıb nəzarət edir? Kim bilmir ki, xalqın nəzarət missiyasını üzərinə götürmüş qurumlar var, onlar bununla məşğul olur – yuxarıda dediyimiz kimi, mətbuat, siyasi partiyalar, QHT-lər… Indi biz neyləyək, başımıza haranın daşını tökək ki, siz onların hamısını dibindən qaşımısınız, məhv eləmisiniz?
Bir də ki, axı niyə “görülən işlərə nəzarət” vəzifəsi yalnız xalqın boynuna qoyulmalıdır? O zaman hara baxır, kimə lazımdı sizin hüquq-mühafizə orqanlarınız, prokurorluğunuz, məhkəmələriniz? Bu qədər adama maaşı niyə verirsiniz o zaman? Bu qədər adamın işinin adı nədir? Onların işini də xalq görəcəksə, niyə büdcədən bəslənməlidirlər, sonra da yan gəlib yatmalıdırlar?
Ümumiyyətlə, doğrudan da, “görülən işlərə xalqın nəzarət eləməsini” istəyirsinizsə, onda niyə qoymursunuz banana da xalq nəzarət eləsin? Bəs qara kürüyə nəzarət eləməyi niyə xalqa tapşırmırsınız? Bəs biz neftə niyə uzaqdan uzağa tamaşa eləməliyik, bəs bizi neftə niyə nəzarət eləməyə qoymursunuz?
***
Amma bir halda ki, siz görülən işlərə nəzarət edilməsində bu qədər israrlısınız, bu qədər inadçısınız, o zaman mənim bir təklifim var: zəhmət çəkin, bizim yataqlarımıza, otaqlarımıza qoyduğunuz kameraları götürün, aparın görülən işlərinizə yerləşdirin. Körpülərinizə, yollarınıza yerləşdirin. Beləcə, istədiyiniz qədər nəzarət eləyin.
Hətta arada o görüntüləri “Lider”də də göstərin ki, xalq baxsın, ölkədə əsl əxlaqsızlığın körpü, yol, xəstəxana, məktəb, idman-olimpiya kompleksi tikmək adı altında haralarda baş verdiyini anlasın artıq.