Avropanın ən öndər təşkilatlarının korrupsiya, söz azadlığı, insan haqları hesabatlarını “qərəzlidir” deyə, “ermənilərin sifarişidir” deyə, “ədalətli deyil” deyə əllərinin arxası ilə geri çevirənlər “Avroviziyon”da birinci yeri tutduq deyə həmən valı dəyişdilər. Bu dəfə “ədalətli Avropa”, “dürüst Avropa”, “qərəzsiz Avropa” hekayələrinə qaz verdilər.
Anlayacağınız, o boyda Avropa Şurasına bir quş, Avropa Ittifaqına bir quş, Avropa Məhkəməsinə bir qoz. Varsa da “Avroviziyon”, yoxsa da “Avroviziyon”.
***
Avropa Məhkəməsi dedim yadıma düşdü – Eynullaya dərhal azadlıq qərarı çıxaranda Avropa pis idi, amma indi sizi bir manıs yarışmasında birinci etdi deyə eyni Avropa yaxşımı oldu? “Avroviziyon”da Eldar qalib gələndə sevincinizdən dombalaq aşırsınız, bəs Avropa Məhkəməsində Eynulla qalib gələndə niyə üz-gözünüzü əyirdiniz? Indiyədək ağzınızı açanda Avropanı “ikili standartlar”da günahlandırırsınız, bəs özünüzün Avropadakı qələbələrə bu “ikili standart”ınız nə üçündür?
***
Utanmadan çıxıb “Avropa ən doğru seçimi etdi”, “Avropanın Azərbaycana səs verməsi ədalətin təntənəsidir” deyə yaxa-başını cırır rejim yandaşları.O zaman əlbəttə, biz də çıxıb soruşacağıq: bəs Avropa da sizdən dürüst seçkilər keçirməyi, səsləri ədalətli saymağı tələb edəndə niyə tumanınızı başınıza geyinirsiniz, “bizim öz yolumuz var” deyə, niyə bas-bas bağırırsınız, niyə “Heç kim bizim daxili işimizə qarışa bilməz” deyə, atılıb-düşürsünüz? Işinizə yarayanda dürüst seçki, ədalətli səsvermə yaxşıdır da, işinizə yaramayandamı pisdir?
***
Yeri gəlmişkən, “bizim öz yolumuz var”, “heç kim bizim daxili işimizə qarışa bilməz” mifini də alt-üst etdi “Avroviziyon”. Bundan sonra hakimiyyətdəkilər Avropa dəyərlərindən söz düşəndə öz yollarının olduğunu söyləyə bilməyəcəklər, söyləyəndə qarşılarında daşdan keçən arqumentimiz olacaq: bəs şouda niyə öz yolunuz yoxdur? Niyə şouda Avropa daxili işinizə qarışa bilər, amma demokratiyada yox?
***
Indi yaptokratlar “Böyük fəxrdir ki, 2012-ci ildə Avropanın hər yerindən Azərbaycana sənətçilər gələcək” deyə yeri-göyü inlədirlər ya… Bu da onların özünə qarşı yönələn sözlərdir. Çünki istər-istəməz soruşur adam: bəs iki ildir eyni Avropadan siyasi məruzəçinin gəlməsinə niyə icazə vermirsiniz? Avropadan müğənni gələ bilər də, məruzəçimi gələ bilməz? “”Avroviziyon”un yüksək səviyyədə təşkil edilməsi üçün Azərbaycan üzərinə düşən hər şeyi edəcək” deyirsiniz, bəs Avropa Şurası qarşısında üzərinizə düşən hər şeyi niyə etmirsiniz? Avropa Şurası qarşısında 11 ildir götürdüyünüz öhdəlikləri niyə yerinə yetirmirsiniz?
***
Qısası, “Avroviziyon”dakı birincilik Azərbaycan adına bəlkə də bir qələbədir, ola bilər, mübahisə edəcək halım yoxdur. Amma bunu dəqiq bilirəm ki, “Avroviziyon”dakı birincilik Azərbaycan hakimiyyəti adına acı məğlubiyyətdir. Hakimiyyətin maskası növbəti dəfə yırtılmış, onun gerçək üzü ortaya çıxmışdır. Məlum olmuşdur ki, illərdir Avropadan gələn demokratiya tələblərini bu qulağından alıb, o biri qulağından ötürən…Avropa Məhkəməsinin Eynulla ilə bağlı qərarını xor görən…
Avropanın azad seçki, azad söz, sərbəst toplaşmaq, ədalətli məhkəmə çağırışlarını yumşaq yerinə almayan bir hakimiyyətin bütün bunları illah ki, “ikili standartlarla” izah etməyə çalışması, özünə qarşı olan haqlı tənqidlərin, doğru tələblərin içində illah ki, bir “erməni barmağı”, bir “xristian təəssübkeşliyi” axtarması filfilodan, fiksiyadan başqa bir şey deyilmiş. Nağıl imiş, mif imiş.Bundan sonra Avropanın tənqidçi hesabatları, demokratiya, azadlıq tələbləri qarşısında rejimin ən güclü “silah”ı əlindən alınmış, bu hesabatlar qarşısında boyunlarını bükməkdən, gözlərini döyməkdən başqa çarələri qalmamışdır. “Ikili standartlar”, “erməni barmağı”, “xristian təəssübkeşliyi” kimi düşük bəhanələr getmişdir işinin dalınca.
Ona görə də deyirəm ki, “Avroviziyon”dakı birincilik hakimiyyət adına qələbə deyil, əksinə, acı məğlubiyyətdir.Azacıq ağılları olsa, sevinəcəklərinə utanarlar.
