Cabbar! Düşündüm də, bundan sonra hər bazar sənə yazacam. Zatən bu ölkənin çirkinliklərindən, iyrəncliklərindən bu günədək yalanla kirlənməmiş, bu qədər əxlaqsızlığın, şərəfsizliyin içində tərtəmiz qalmış birinə yazmayıb da kimə yazmaq olar ki, Cabbar!Bir foton var, Cabbar, çiyinlərindən asdığın bayraqla birgə olan fotonu deyirəm. Boyun nə qədər? 1.80 ola, olmaya. Amma bilirsən ki, bizim kral həzrətləri bayrağı uca tutmağı onu hündür bir yerə – 165 metrliyə dikmək kimi başa düşdüyü üçün 30 milyon manat çıxardı dövlətin cibindən. Oysa sən 3 qəpiksiz belə bayrağı 2 metrin altındakı boyunla “ən uca bayraq dirəyi”ndən də uca tutmağın nümunəsini göstərdin hər kəsə. Əslində sənin cibindən də narkotiki ona görə çıxardılar ki, özləri bundan sonra milyonları, milyardları dövlətin cibindən rahat-rahat çıxarmağa davam etsinlər.
Cabbar!
Bunların bir daxili işlər naziri var – sənin cibindən nəşə çıxaranların başındakı adam. Bilirsən, bir neçə il əvvəl polisin içindəki qanqster dəstəsi ifşa edilib onun özünün də quyruğu qapı arasında qalınca həmin günədək “ümummilli lider” deyib, “ulu öndər” deyib öydüyü adamı bir andaca “satmışdı”, ələ vermişdi. Nə var, nə var, özü məsuliyyətdən qurtula, sudan quru çıxa, oturduğu kreslonu qoruya bilsin.Amma sən evindən şəkillərini asdığın Rəsulzadə, Elçibəy kimi gerçək öndərlərin dəyərləri uğrunda sonadək geri addım atmadın, həbsi, gəncliyinin ən gözəl illərini dəmir barmaqlıqlar ardında keçirməyi göz önünə aldın. Və bununla da onlarla bizim aramızdakı əxlaq fərqini göstərdin əslində. Nə deyim, Cabbar, yalnız buna görə sənə bir ömür borcluyuq. Biz də borcluyuq, bizdən sonra gələnlər də borclu olacaq. Məndən səninlə eyni kameranı, eyni kameranın soyuqluğunu, qaranlığını, rütubətini paylaşan hər kəsə çoxlu salam! Hər nə qədər onlar yanlarındakı gəncəcik bir insanın bu millətin qüruru, bu dövlətin üzağlığı olduğunun fərqində olmasalar da…Doludan daha insaflı Isa
Dünən gecə Şamaxıya güclü dolu yağıb, 1000-dən artıq evin dam örtüyü dağılıb, 100-dən çox avtomobilin, elə bir o qədər obyektin şüşələri sınıb. Gəlin biz şükür eləyək ki, 2 aprel mitinqində bu cür dolu Bakıya yağmamışdı, yoxsa bu saat hərəmizin ayağına bir evin damını uçurub, bir avtomobilin şüşəsini sındırdığımızı yazmışdılar, elliklə hamımızı doldurmuşdular içəri, hətta Dunya Miyatoviçlə görüşmək üçün çöldə bir nəfər də müxalifətçi qalmamışdı. Üstəlik, biz Tanrıya dua eləməliyik ki, bundan sonra müxalifətin mitinqləri zamanı dolu yağdırmasın, elə hakimiyyətin göndərdiyi şüşəqıran Isa Məhərrəmov kifayətdir. Nə də olmasa, Isa doludan daha insaflıdır – iki-üçdən artıq şüşə qırmır.
Gülər Əhmədova, söz yenə səndədir!
5 yaşlı “Azadlıq!” bağıran, “Istefa!” hayqıran qızımızı “anası həyat qadınıdır” deyə aşağılayan, guya onun cocuqluğunun istismar edilməsinə görə yeri-göyü inlədən Gülər Əhmədova, məni yaxşı dinlə.
Sən uşaqların istismarına qarşısan ya… Sən onları erkən yaşda siyasi maraqlara alət etməyə qarşısan ya… Indi buyur: sevimli hakimiyyətin Heydər Əliyevin doğum günü münasibəti ilə şagirdlər arasında yazı müsabiqəsi keçirir.
Gerçəkdən də bir uşaq müdafiəçisisənsə, gerçəkdən də uşaqların siyasətə alət edilməsinə qarşısansa, gerçəkdən də uşaqların istismarından yana deyilsənsə, göstər mərifətini. Buna da etiraz et, buna da üsyan bağır.Intizarla gözləyirəm.
