Görəsən, dünyada Ilham Əliyev qədər tikinti ilə öyünən ikinci bir dövlət başçısı varmı? Çətin. Hətta Misir fironu dirilib gəlsə, o da öz piramidaları ilə bu qədər öyünməz yəqin ki.
Bizim kral ağzını açanda ancaq inşaatdan danışır. Nə deyir? “Körpülər tikirik” deyir, “məktəblər tikirik” deyir, “xəstəxanalar tikirik” deyir, “parklar, meydanlar tikirik” deyir. Anlayacağınız, ölkəni tikə-tikə gedir.Körpülər tikir, doğrudur, amma o biri yandan da xalqla, dünyayla körpüləri yandırır. Özünü milli iradənin üzərində görür, hüququn üzərində görür.Xəstəxanalar tikir, doğrudur, amma ölkəni korrupsiyadan, ədalətsizlikdən, məmur özbaşınalığından, seçki saxtakarlığından sağaltmaq istəmir.Məktəblər tikir, doğrudur, amma o biri yandan da yüksək təhsil almış, intellektli, savadlı, bu millətin və dövlətin göz bəbəyi olan gənclərini həbsxanalara doldurur.
Meydanlar tikir, doğrudur, amma o biri yandan da xalqa dərdini demək üçün üç-üç, beş-beş toplaşmağı yasaqlayır, insanlara bir yerə yığışmaq üçün meydanları yox, ucqardakı stadionları göstərir.Soruşmağa haqqınız var belədə: o zaman niyə tikir ki, bunları? Bunları tikməyin nə mənası qalır ki? Cavab aydındır, hər halda, dövlətin cibindən pulları çıxararkən, “əfəndim, siz bizi məzur tutun, Dubayda villa tikəcəyik də, bizə büdcədən 70 milyon manat lazımdır” deməyəcəklər. Bunların məktəb, xəstəxana, körpü, canım sizə desin, idman kompleksləri tikməyinin o vaxt bir anlamı olacaq ki, öncə öz ciblərinin ağzını tiksinlər.
***
Əslində, buracan yazdıqlarımızı Misir Mərdanovun sözçüsünün srağagün “Azadlıq” radiosundan səsləndirdikləri də təsdiqləyir. Bayram Hüseynzadə adlı bu cənab deyir ki, bizim məktəblərdə şagirdlərdən pul yığmağa ehtiyacımız yoxdur, çünki dövlətimizin çoxlu pulları var. Əsl bombanı isə sözlərinin davamında partladır: “Biz dəyəri bir milyon olan, beş yüz min olan məktəblər tikirik – saray kimi”.Allah sizi güldürsün! Bəs biz illərdir, erməninin xaçına söymürük ki. Biz də elə bunu deyirik də, deyirik ki, məktəb tikirsiniz yaxşı eləyirsiniz, bəs onu 1 milyona niyə tikirsiniz? Bəs onu saray kimi niyə tikirsiniz? Deyirik ki, saray tikirsiniz, amma məktəb yox. Deyirik ki, saray niyə tikirsiniz, elə məktəb tikin də.
Iqtisadçılar 2008-ci ildə tikilən məktəblərin dəyərini hesablamışdılar, məlum olmuşdu ki, bir sinif otağı 78 min manata başa gəlib. Normal ölkədə onun adı artıq məktəb deyil, mənimsəmədir. Biz bunu deyirik.Deyirik ki, necə olur, Yaponiya səfirliyi Qubanın rayon mərkəzindən 60 metr uzaqlıqda yerləşən Xanagah kəndində 70 min manata məktəb tikir, amma Misir Mərdanovun nazirliyi Xaçmaz rayonunda, özü də şəhər mərkəzinin qulağının dibində eyni məktəbin tikintisinə 144 min manat xərcləyir?Qısaca, deyirik ki, məktəb tikirsiniz, amma büdcəni də sökürsünüz. Yəni sizin dərdiniz millətin savadlanması deyil, büdcənin sağılmasıdır.
***
Ilham Əliyevin məktəbləri saray kimi tikdirməsinə gəlincə… Qoy Misir müəllimin sözçüsü elə hesab etməsin ki, saray kimi məktəb tikmək böyük mərifətdir. Saray kimi məktəb tikmək o deməkdir ki, siz bu millətin uşaqlarına orada yaltaqlıq, köləlik öyrətdiyinizi etiraf edirsiniz. Şahın hüzurunda necə dayanmağı, necə təzim etməyi, necə baş əyməyi, necə “bəçeşm” deməyi öyrətdiyinizi boynunuza alırsınız. Bundan utanacağınıza qürur hissi keçirirsinizsə, mənim deyəcək başqa sözüm qalmır.
Əslində sizdə günah da yoxdur. Günah məndədir ki, 18 ildir ədalət, insanlıq, hüquq dərsi almaq istəməyən, ölkəni çağdaş dəyərlərlə, demokratik prinsiplərlə idarə etməkdə hər il böyük bir inadla sinifdə qalan bir zehniyyətin tikdiyi sinif otaqları haqqında bayaqdan bəri çənə döyürəm.
