Qubad İbadoğlu: «Bu, sərfəli biznesdir»
Britaniyada daşınmaz əmlak bazarında azərbaycanlıların çəkisi getdikcə artır. Məlumatlara görə, Londondakı mənzil bazarının yeni alıcıları əsasən, Rusiya, Qazaxıstan və Azərbaycandan gələnlərdir.
Britaniya mətbuatı yazır ki, 2012-ci ildə London evlərinin yalnız 27 faizini yerli əhali alıb. Qalan hissəni təşkil edənlərsə əsas etibarilə əcnəbi alıcılardır ki, bu sırada varlı azərbaycanlıların sayı üstündür.
Bir faktı qeyd edək ki, 2012-ci ildə Azərbaycanın Dövlət Neft Fondu da bu bazara daxil olub və qurum Londonun mərkəzindəki məşhur St Cames’s Street küçəsində 180 milyon funt-sterlinq dəyərində bina alıb. “Financial Times” qəzetinin araşdırmasına görə, 10 min kvadratmetr ofis sahəsi olan bu bina əvvəllər bir neçə mötəbər bankın iqamətgahı olub və kirayə haqqından ildə 10 milyon funt sterlinqədək qazanc gətirir. Qəzet yazır ki, Azərbaycan Dövlət Neft Fondu binanı 2023-cü ilədək HSBC bankına kirayəyə verib.
Ekspertlər Londonun mərkəzində 2005-ci ildən bəri evlərin qiymətinin iki dəfə artdığını bildirir. Qəzet həmçinin yazır ki, Londondakı bina Azərbaycan Neft Fondunun bütün Avropa paytaxtlarındakı 1 milyard funt-sterlinqlik ev bazarlığının yalnız bir hissəsidir. Hazırda Londonun zəngin hissələrində azərbaycanlılardan ibarət məhəllələrin olduğu da vurğulanır.
Iqtisadçı-ekspert Qubad Ibadoğlu deyir ki, Neft Fondunda 2011-ci ilin yekunları üzrə idarəetməyə verilən vəsaitdən daxil olan gəlirlər 0,75 faiz təşkil edirdi. 2012-ci ildə isə bu rəqəm 2,2 faizə qalxıb. Neft Fondu bir növ investisiya siyasətinə dəyişiklik etməklə daha çox qazanmağa başlayıb: “Neft Fondunun investisiya siyasətindəki dəyişikliyə görə, aktivlərin məbləği hazırda 34 milyarddır. O, aktivlərin 5 faizini əmlak bazarına yerləşdirə bildiyi üçün bunu edir. Həmin 5 faiz isə 1,7 milyard edir. Bu məbləği isə onlar indiki aktivlərin səviyyəsinə görə əmlak bazarına qoya bilər. Onu da qeyd edim ki, Fond yalnız London, Paris və digər şəhərlərdə deyil, bəzi offşor zonalarda, adalarda da əmlaklar alıb”.
Ekspert vurğulayır ki, prinsipcə bu, sərfəli biznesdir. Çünki bu istiqamətdə ikitərəfli qazanc var. Bir tərəfdən həmin əmlakın özü bahalaşmaqla onun yenidən qiymətləndirilməsi əlavə dəyər yaradır. Daha sonra, həmin əmlakı icarəyə verərək ondan faktiki olaraq qazanc əldə edirlər: “Yəni, hər iki qazanc son nəticədə müəyyən qiymətli kağızlarda yerləşdirilən vəsaitlərlə müqayisədə daha çox məbləği ifadə edir. Qiymətli kağızlar, maliyyə bazarı bu gün çox həssasdır, yəni, orada belə əmliyyatları aparmaq o qədər də sərfəli deyil. Çünki böyük qazanc yoxdur və risklər də yüksəkdir”.
Nigar