AXCP Rəyasət Heyətinin üzvü Fuad Qəhrəmanlı
Bu gün səhər saatlarında Azərbaycanın Tehrandakı səfirliyinin binasına silahlı basqın edilib. Hücumun qarşısını almağa çalışarkən səfirliyinin mühafizə xidmətinin rəhbəri Orxan Əsgərov həlak olub, iki nəfər isə yaralanıb.
İlkin dəqiqləşməmiş məlumata görə, hücumu həyata keçirən şəxs Yasin Hüseynzadə adlı İran vətəndaşı olub.
Bu baş verən hadisə kiminsə fərdi qaydada həyata keçirdiyi zorakılıq, silahlı hücum fəaliyyəti deyil, xüsusi olaraq planlaşdırılaraq həyata həyata keçirilən terrordur və Azərbaycan dövlətini təhdid etmək məqsədi daşıyır.
Bu silahlı hücumun arxasında İran xüsusi xidmət orqanlarının durması ehtimalı kifayət qədər yüksəkdir. Bu günə qədər İran generallarının Azərbaycanı hədələnməsi ilə bağlı çox saylı nümunələr olduğunu unutmamalıyıq.
Yəqin ki, bir məqsəd ermənilərin əli ilə İsraillə yaxınlaşan Azərbaycanı cəzalandırmaqdır.
Diqqəti cəlb edən bu hadisənin dünən ABŞ və İsrailin birgə keçirdiyi indiyə qədərki ən böyük hərbi təlimlə eyni vaxtda baş verməsidir. Bu təlimdə gəmilərlə yanaşı B-52 strateji bombardmançılar və F-35 lər də daxil olmaqla 142 təyyarə iştirak edir. Bu miqyasda təlim açıq aşkar İrana qarşı əməliyyatlara hazırlıq kimi dəyərləndirilir və Tehran da öz növbəsində yaxınlaşan təhlükəni hiss edir. Odur ki, İran rejimi bu terrorla İsrailin regiondakı ən yaxın müttəfiqi kimi Azərbaycanı hədəf seçməklə, hər cür gözlənilməz cavablara hazır olduğu ilə bağlı İsrailə və onunla əməkdaşlıq edən Azərbaycana mesaj vermiş olur.
Daha az ehhtimal olunan bir variantda budur ki, bu terror aktının törədilməsində Rusiya xüsusi xidmət orqanlarının əli ola bilər. Blinkenin İlham Əliyevə zəngindən sonra Brüssel danışıqlarının yenidən başlaya biləcəyi və son günlər beynəlxalq təzyiqlərlə üzləşən Azərbaycanın Laçın yolundakı aksiyanı dayandıracağı ehtimalı yaranıb. Bu da regionda gərginliyin azalması və dialoq mühitinin yaranacağı və beləliklə də Rusiyanın ofsayda qalacağı ilə bağlı Moskvada narahatlıq yaradıb. Ona görə də Rusiya Azərbaycan və İran arasında gərginliyi qızışdıraran belə bir terror təşkil etməklə, regionda yenidən vəziyyəti gərginləşdirməyə çalışa bilər.
