Noyabrın 16-da Amerika Birləşmiş Ştatlarının dövlət katibi Entoni Blinken Azərbaycan prezidenti İlham Əliyevə zəng edib
Noyabrın 16-da Amerika Birləşmiş Ştatlarının dövlət katibi Entoni Blinken Azərbaycan prezidenti İlham Əliyevə zəng edib.
Bu barədə Azərbaycan Prezidentinin mətbuat xidməti məlumat yayıb.
Məlumata görə, ABŞ dövlət katibi bu il noyabrın 7-də Vaşinqtonda Azərbaycan və Ermənistan xarici işlər nazirlərinin sülh müqaviləsi üzrə növbəti danışıqlarının keçirildiyini və onların iki ölkə arasında münasibətlərin normallaşma prosesinə töhfə vermək əzmində olduğunu vurğulayıb.
Prezident İlham Əliyev isə qeyd edib ki, bu istiqamətdə göstərilən səylərə, aparılan danışıqlara baxmayaraq, Ermənistan rəhbərliyinin son günlərdə səsləndirdiyi ziddiyyətli bəyanatlar iki ölkə arasında münasibətlərin normallaşmasına və sülh gündəliyinin irəli aparılmasına mənfi təsir göstərir:
“Telefon danışığı əsnasında Ermənistan ilə Azərbaycan arasında sülh müqaviləsi üzrə növbəti görüşün keçirilməsi və etimad quruculuğu tədbirlərinə dair fikir mübadiləsi aparılıb.”
Vaşinqton görüşü
9 gün öncə, noyabrın 7-də ABŞ-da Entoni Blinkenin vasitəçiliyi ilə Azərbaycan və Ermənistan xarici işlər nazirləri görüşmüşdü.
Azərbaycan Xarici İşlər Nazirliyinin məlumatına görə, nazirlər mümkün sülh müqaviləsinin elementləri ilə bağlı fikir mübadiləsi aparıb, hələ də həll edilməli olan bir sıra məsələlər olduğunu qeyd ediblər:
“Hər iki tərəf Azərbaycan və Ermənistan liderlərinin oktyabrın 6-da Praqada, oktyabrın 31-də isə Soçidə keçirdikləri görüşlərdə götürdükləri öhdəlikləri bir daha təsdiq ediblər”.
Soçi və Praqa görüşləri
Bundan öncə, oktyabrın 31-də Soçidə Rusiya, Azərbaycan və Ermənistan liderlərinin üçtərəfli görüşü keçirilmişdi.
Görüşdən sonra Rusiya prezidenti Vladimir Putin demişdi ki, görüş çox faydalı olub. Lakin vurğulayıb ki, razılaşdırılmayan məsələlər də olub.
Bununla belə, tərəflər üçtərəfli görüşün yekunları ilə bağlı bəyanat qəbul ediblər. Bəyanatda Rusiya sülhməramlı kontingentinin Qarabağda təhlükəsizliyin təmin olunmasına mühüm töhfəsi qeyd edilib.
Əslində ötən ilin dekabrından başlayaraq iki ölkə arasında sülh danışıqları Avropa İttifaqının (Aİ) vasitəçiliyi ilə aparılırdı.
Azərbaycanla Ermənistan liderlərinin həmin formatda sonuncu görüşü də oktyabrın 6-da Aİ Şurasının prezidenti və Fransa dövlət başçısının iştirakı ilə Praqada gerçəkləşmişdi.
Həmin görüşdən sonra Ermənistan Azərbaycanla sərhədə mülki Aİ missiyası göndərilməsinə razılıq vermişdi.
Azərbaycan prezidenti dəfələrlə bəyan edib ki, Qarabağ münaqişəsi həll edilib, onun statusu heç vaxt müzakirə mövzusu ola bilməz.
Ermənistan tərəfi isə fərqli mövqe nümayiş etdirir.
Ermənistan baş naziri Nikol Paşinyan isə bu yaxınlarda deyib ki, əgər Qarabağ məsələsi həll olunubsa, yerli ermənilər bunu niyə hiss etmirlər:
“Dağlıq Qarabağın erməniləri niyə məsələnin həll olunduğunu hiss etmirlər? Niyə Azərbaycan qoşunları Dağlıq Qarabağın ətrafında mövqelər qurub?..”
Contact.az