Biz, vətəndaş cəmiyyəti nümayəndələri, ölkədə sistemli hala çevrilən insan haqları pozuntularından, səlahiyyətli dövlət təmsilçilərinin qanunsuz və insanlığa sığmayan hərəkətlərindən, belə hərəkətlərə hüquqi qiymət verilməməsindən dərin narahatlıq keçiririk.
Qurama ittihamlarla tutulub azadlıqdan məhrum edilən Qarabağ qazisi Saleh Rüstəmlinin həyatı, artıq bir neçə həftədir ki, təhlükə altındadır. Saxta ittihamlara, ədalətsiz məhkəmə qərarlarına 28 gündür ki, aclıq keçirməklə etiraz edən Saleh Rüstəmlinin ölüm riski bütün cəmiyyətdə ciddi həyəcan doğurmaqdadır. Bu narahatlıqlara, ölüm riskinə rəğmən, onun hələ də həbsdə saxlanılması, gərəkli addımların atılmaması Qarabağ müharibəsi zamanı və müharibə sonrası formalaşmaqda olan qarşılıqlı etimad, güvən mühitinə ciddi yaralar vurmaqdadır. Cəmiyyətin bu hadisədən narahat olan müxtəlif təbəqələrindən ölkə rəhbərliyinə, hökumətə ünvanlanan çağırışlar, təəssüflər olsun ki, indiyə qədər diqqətə alınmayıb və zəruri addımlar atılmayıb.
Qeyd etdiyimiz hərəkətsizliyin fonunda Saleh Rüstəmlinin sağlıq durumunun getdikcə ağırlaşmasından narahat olan, narahatlıqlarını səlahiyyətli şəxslərin, qurumların diqqətinə çatdırmaq, onları təxirə salmadan zəruri addımlar atmağa təşviq etmək istəyən bir qrup vətəndaş, dekabrın 1-də Bakı şəhərində dinc aksiya keçirməyə cəhd edib. Hətta bu aksiya cəhdinə belə qeyri-adekvat reaksiya verilib.
Aksiyaya qatılan müxalif siyasətçi, həm də Qarabağ müharibəsi qazisi olan Tofiq Yaqublunu polislər saxlayıb, o, misli görünməmiş zorakılığa məruz qalıb, tanınmaz hala salınıb, Bakıdan 70 km uzaqlıqda köməksiz halda atılıb. Aksiyaya cəhd edənlərdən Paşa Dadaşzadə də oxşar rəftara məruz qalıb, qolu bir neçə yerdən sındırılıb.
Aksiya zamanı ümumilikdə saxlanılan 40 nəfərə yaxın şəxsdən Səyyad Quliyevə, Elxan Əliyevə, Elçin Teymurova, İlham Hüseyn və Rüstəm İsmayılbəyliyə isə 15-30 sutka arasında inzibati həbs verilib.
Dinc, ölkənin problemlərinin birgə, əl-ələ həlli çağırışı, təşəbbüsü ilə keçirilməsinə cəhd edilən aksiya iştirakçılarının üzləşdikləri belə rəftar nə ölkə Konstitusiyasına, nə onun qanunlarına, nə də Azərbaycanın tərəfdar çıxdığı beynəlxalq müqavilələrə uyğun gəlir. Vətəndaşlarla belə rəftar etmək Azərbaycanın cinayət qanunvericiliyi ilə tənzimlənən əməllərə yol vermək deməkdir. Hüquq-mühafizə orqanlarının, məhkəmələrin ədalətsiz qərarlarının nəticələrinin aradan qaldırılması məqsədinə xidmət edən aksiyaya qatılanların misli görünməmiş zorakılığa, həbslərə məruz qalması, bir neçə gün keçməsinə baxmayaraq, əlaqəli qurumların hələ də gərəkli hüququ addımlar atmaması, bu haqda ictimaiyyəti bilgiləndirməməsi, cəmiyyətimizin narahatlığını daha da artırır.
Biz, bu müraciətə imza atan ictimai-siyasi fəallar, hüquqşünaslar, jurnalistlər olaraq hökumətdən ölkəmizin işıqlı gələcəyi naminə həll edilməsi çox önəmli olan problemlərin aradan qaldırılması üçün təxirə salmadan insani və hüquqi addımlar atmasını istəyirik. Hökumət ən qısa zamanda Saleh Rüstəmlinin azad edilməsi üçün mümkün hüquqi və siyasi mexanizmləri işə salmalı, saxta ittihamla cəza çəkən vətəndaşın həbsxanada həyatını itirməsi ləkəsinin ölkəmizin üzərinə düşməsinə imkan verməməlidir.
T.Yaqubluya, P.Dadaşzadəyə qarşı heç bir hüquqi ölçüyə gəlməyən əməllərə yol verənlər mütləq ədalət mühakiməsi qarşısına çıxarılmalı, hüquq-mühafizə qurumları üçün vətəndaşlarla rəftar zamanı örnək ola biləcək ən sərt qərarlar qəbul edilməlidir.
İmzalar:
- Akif Qurbanov
- Aqil Layıc
- Alya Yaqublu
- Anar Məmmədli
- Aynur Elgünəş
- Azər Mehtiyev
- Bəxtiyar Hacıyev
- Bəşir Süleymanlı
- Cavad Cavadov
- Elçin Sadıqov
- Elman Fəttah
- Elmir Abbasov
- Əhməd Məmmədli
- Əlayif Həsənov
- Ələsgər Məmmədli
- Ənnağı Hacıbəyli
- Əsabəli Mustafayev
- Fərid İmanov
- Fikrət Cəfərli
- Gülər Abbaslı
- Hafiz Babalı
- Hafiz Həsənov
- Xalid Ağaliyev
- Xalid Bağırov
- Xədicə İsmayıl
- İlham Hüseynli
- İntiqam Əliyev
- Qabil Abbasoğlu
- Qənimət Zahid
- Mehman Əliyev
- Mehman Hüseynov
- Mirəli Hüseynov
- Namiq Abdullayev
- Nazim Bəydəmirli
- Nemət Kərimli
- Nəsimi Məmmədli
- Rövşən Ağayev
- Rövşən Hacıbəyli
- Ruslan İzzətli
- Rüfət Səfərov
- Samir Əliyev
- Samir Kazımlı
- Seymur Kazımov
- Səməd Rəhimli
- Şahin Cəfərli
- Şahvələd Çobanoğlu
- Şəhla Hümbətova
- Şəhla İsmayıl
- Şəmşad Ağa
- Toğrul İsmayılov
- Toğrul Vəliyev
- Ülvi Həsənli
- Vasif İsmayıl
- Yadigar Sadıqlı
- Yalçın İmanov
- Zaur Əkbər
- Zəfər Əhmədov
- Zibeydə Sadıqova
- Ziya Quliyev
- Zöhrab İsmayıl
