İctimai fəal Bəxtiyar Hacıyev
❗8 aydan artıqdır ki, fasiləsiz olaraq dövlət qurumları səviyyəsində himayə olunan əxlaqsızca bir mənəvi terror, qaralama, böhtan, hədə-qorxu, təxribat cəhdləri ilə üz-üzəyəm.
Bu müddət ərzində Prezident Administrasiyası, Birinci vitse-prezidentliyin katibliyi, DİN, DTX, Baş Prokurorluq, Ədliyyə Nazirliyi, məhkəmələrə davamlı olaraq rəsmi müraciətlər etmişəm. Onların əvəzinə araşdırma aparıb, faktları təqdim etmişəm. Nəticədə ən yaxşı halda formal “heç nə edə bilmirik” cavabı verilib, ən pis halda isə ümumiyyətlə cavab verilməyib.
Məhkəmələrə etdiyim şikayətlər təmin edilməyib, uzadılıb, müxtəlif bəhanələrlə geri qaytarılıb.
Bundan başqa tanıdığım və tanımadığım bütün rəsmi şəxslərə, müavinlərinə, köməkçilərinə, hakimiyyətin ağsaqqallarına şəxsən müraciət etmişəm ki, bu ləyaqətsiz mübarizə üsulunu dayandırsınlar. Öz rəhbərlərinin şəxsi təcrübəsi və əxlaqı çərçivəsində qaralama edərək məni etibarsızlaşdırmağa çalışıblar. Bircə dəfə ağsaqqallarını dinləyib, 3 gün dayanıblar, sonra yenə davam ediblər. Bəhanələri də o olub ki, anonim şəxslərdir, biz DİN və DTX olaraq onları tapa bilmirik. Amma ayrı-ayrılıqda bir-birinin üstünə atıblar ki, bu ləyaqətsiz mübarizənin arxasında dayanan biz deyilik, onlardır.
Anonim olmayan, öz adı ilə davamlı yazan, məni təhqir edib, mənə böhtan atan alovlulardan, profil fotosuna M.Əliyevanın fotosunu qoyub, “Mehriban Əliyeva anamdır” deyən fuadmuradovlardan da şikayətlərə cavab gəlməyib, araşdırılmayıb. Ən yaxşı halda birincisi barədə “50 gündür izahat ala bilmirik ondan” deyilib, ən pis halda ikincisi barədə ümumiyyətlə cavab verilməyib.
Məhkəməyə böhtan və təhqirlə bağlı müraciət etmişəm, CPM-ə görə hazırlıq iclasında aidiyyət, CPM tələblərinin yoxlanması və digər məsələlərə baxılmalı olsa da, 4 dəfə baxış iclasına bərabər, çıxışlar olan, uzun iclaslar olub, sonra növbəti həftəyə təxirə salıblar.
Məhkəmə iclas zalında qarşı tərəf dəfələrlə tərbiyəsizlik edərək təhqir və böhtanlarına davam edib, hakim müdaxilə etməyib. Hakim müşavirəyə gedəndə təxribat olmaması üçün zaldan çıxanda arxamca söyüş söyülüb, mən qayıdıb əlimdəki sənədləri masaya vuraraq qarşı tərəfdən tərbiyəli olmasını tələb etmiş, xəbərdarlıq etmişəm, zaldan çıxanda arxamca şüşə stəkan zərbə ilə atılıb, qapıya dəyərək sınıb, xuliqanlıq edilib.
Amma mən bu hadisənin aktlaşdırılmasını tələb edəndə “iş saatı bitib, 1-ci gün gələrsiniz, edərik” deyilib. İş saatı bitəndən sonra necəsə həmin iclasın keçirildiyi zaldan qeyri-qanuni, bir rakursdan çəkilmiş, səssiz və yarımçıq video kənara çıxıb.
Daha sonra həmin video müxalif siyasətçilərin və digər şəxslərin sındırılmış (hack edilmiş) hesablarından yayılıb, ayrı-ayrı saytlara bunu tirajlamaq tapşırılıb.
Bu gün Yasamal Rayon Məhkəməsinə gedərək akt tərtib edilməsini, o videonun kim tərəfindən və niyə qanunsuz olaraq yayıldığını, həmin iclasın tam video görüntüsünün mənə də verilməsini istəmişəm. Mənə deyilib ki, akt filan olmayacaq, çünki bizə belə tapşırıq gəlib. Kimin tapşırdığını soruşanda “deyə bilmərik, tapşırıq olub ki, akt verilməsin” deyilib.
Sədrin qəbulunda olmaq istəmişəm, yalan məlumat verilib ki, sədr şəhidlərin ildönümü mərasimində iştirak edir. Sədrin binada olduğunu öyrənəndə isə “pandemiyadır, ona görə qəbul edə bilməz” deyilib. “O zaman telefonla vətəndaşların qəbul otağından danışım, müraciətimi edim, bu ki pandemiya qaydalarına zidd deyil” deyəndə “istəsəniz axşama qədər gözləyin, heç nə olmayacaq, tapşırıq belədir” deyilib.
Artıq son günlərə qədər kimlərəsə “şəxsi zəmində münaqişə” kimi görünən, hakimiyyət tərəfindən himayə edilmədiyi barədə gümanlar olan hadisələrin də hakimiyyət tərəfindən himayə edildiyinə zərrə qədər şübhə yeri qoymadılar. İş saatı bitdikdən sonra məhkəmə binasından görüntü çıxarıb, oğurlanmış profillərdən yayılması bir şəxsin yox, müəyyən qurumların imkanları daxilindədir.
Son aylarda mənə və digər fəallara qarşı atılmış bu addımlardan:
▪️Təhqir – cinayətdir.
▪️ Böhtan- cinayətdir.
▪️ Hədə-qorxu ilə tələbetmə- cinayətdir.
▪️ Ailə üzvlərimin, valideynlərimin səsinin yazılması və yayılması – cinayətdir.
▪️ Kibercinayətkarlıqla başqasının hesablarının ələ keçirilməsi- cinayətdir.
▪️ Şəxsi həyatın toxunulmazlığının pozulması – cinayətdir.
▪️ Anonim whatsapp nömrələri ilə 7/24/365 rejimdə hədələmək (mənə və digər bir çox fəallara, siyasilərə, jurnalistlərə, ictimai xadimlərə qarşı) – cinayətdir.
▪️ Məhkəmə zalında kiməsə xəsarət yetirmək üçün şüşə stəkan atıb sındırmaq, xuliqanlıq etmək – cinayətdir.
▪️ Məhkəmə zalından qanunsuz görüntülər çıxarıb, onu oğurlanmış profillərdən yaymaq və KİV-də yaydıraraq böhtan atmaq – cinayətdir.
Amma bu cinayətlərlə bağlı bölmə, rayon, BŞBPİ, BMCMİ, DİN, DTX, Baş Prokururluq, rayon məhkəmələri, Apellyasiya Məhkəməsinə, PA, Birinci VP katibliyinə və digər yerlərə etdiyim bir müraciətlə bağlı bir nəticə olmayıb, əksinə, Əliyevin təyin etdiyi Eyvazov və Nağıyevin hərəkət və hərəkətsizlikləri ilə himayə etdikləri, informasiya mühitini, medianı, sosial şəbəkələri dezinformasiya nəcisinə çevirdikləri şəxslər əl-qol açaraq öz ləyaqətsiz fəaliyyətlərini davam etdirmişlər.
Hüquqi və siyasi bütün yolların qapadıldığını görüb, qarşımda bir neçə yolun açıq qaldığını görmüşəm:
▪️ ya canlı yayım açıb, o təhqir və böhtanları ölkə rəhbərliyinin və ailə üzvlərinin ünvanına ən sərt şəkildə, senzurasız səsləndirmək.
▪️ ya hüquqi yolların qapandığını görüb, mənə qarşı ləyaqətsiz cinayətlər törədənlərə qarşı cinayətə əl atmaq.
▪️ ya hərhansı bir şəkildə silah, partlayıcı və s. əldə edərək terrora, dövlət qurumlarına hücum etmək
▪️ ya da özünə qəsd etmək.
Bu seçimlər arasında uzun illər apardığım mübarizəyə ən uyğunu sonuncu idi və bu gün bütün hüquqi qapıların bağlandığını görüb, bunu reallaşdırmaq üçün Prezident Administrasiyasının binasına daxil oldum. Özümlə götürdüyüm benzin qablarını üzərimə boşaltmağa başladığım anda XDMX zabitləri üzərimə tullanıb, məni yerə yıxaraq qollarımı arxaya burdular, bunun qarşısını aldılar, məni polisə təhvil verdilər.
Polisdə uzun müddət sorğu-sual edildim, izahat alındı və izahat alan prokurur bildirdi ki, məsələ ən yuxarı rəhbərliyə məruzə olunub, bu məsələlərlə bağlı nəticə olacaq. Mən də ona dedikləri bir neçə gün müddətində hərhansı bir irəliləyiş olmasa, yenidən eyni addımı başqa formada, başqa yerdə, bəlkə də kimsənin görməyəcəyi və qarşısını ala bilməyəcəyi yerdə yenidən atacağımı bildirdim.
Bir daha təkrar edirəm ki, mənə və bir çox digər siyasi fəallara qarşı həyata keçirilən, aylardır fasiləsiz davam edən bu ləyaqətsiz kampaniya ölkə rəhbərliyinin iradəsi kənarında baş verə bilməz. Ona görə də bu gün verdiyiniz dəstəyə görə təşəkkür etməklə yanaşı, qarşıdakı günlərdə başıma gələcək bütün hadisələrə görə məhz onu məsul tutmağınızı istəyirəm.
Təsəvvür edin, mən 8 ay müddətində az-çox hüquqlarını müdafiə etməyə çalışan şəxs kimi ölkənin ən tanınmış vəkilləri ilə çalışaraq ən xırda məsələlərdə belə nəticə əldə edə bilmirəmsə, bu hüquq-mühafizə sistemində, bu məhkəmə sistemində sıravi, müdafiəsiz vətəndaş nələr çəkir!
Bu gün hakimiyyətdəsiniz, bu gün güclüsünüz, anladıq. Ən sərt şəkildə, amma mərd formada nə mübarizə aparırsınızsa, nə təzyiq edirsinizsə, hazıram. Amma ləyaqətsizliyinizə dözmək fikrim yoxdur. Siz bu canlıların yardımına möhtac qalaraq bu yollarla mübarizə aparmağı özünüzə layiq bilə bilərsiniz, mən isə özümlə bu ləyaqətsiz şəkildə mübarizə aparılmasını da, eyni üsullarla sizinlə mübarizə aparmağı da özümə layiq bilmirəm.