2020-ci il iyulunda Bakıda keçirilən Orduya dəstək yürüşündə baş verənlərə görə həbs olunub bir neçə ay sonra ev dustaqlığına buraxılan 36 nəfərdən 12-nin işi üzrə məhkəmə istintaqı yekunlaşıb. İyunun 9-da dövlət ittihamçısı onlara, o cümlədən AXCP Rəyasət Heyətinin dörd üzvünə – Fuad Qəhrəmanlı, Məmməd İbrahim, Bəxtiyar İmanov və Ayaz Məhərrəmliyə cəza istəyib.
Şərti cəza
Prokuror çıxışında deyib ki, təqsirləndirilən şəxslərə CM-in 127 (qəsdən sağlamlığa az ağır zərər vurma), 186 (özgə əmlakını zədələmə və ya məhvetmə), 233 (ictimai asayişin pozulması) və 315-ci (hakimiyyət nümayəndəsinə (polisə) qarşı zor tətbiq etmə) maddələri ilə verilən ittihamlar məhkəmədə sübuta yetirilib. Söhbət yürüş zamanı bir qrup şəxsin Milli Məclisə daxil olması, parlamentin yaxınlığındakı küçədə polis maşınını aşırması və başqa əməllərin törədilməsindən gedir.
Amma dövlət ittihamçısı təqsirləndirilən şəxslərin cəzanı həbsdə olmadan çəkmələrini məqsədəuyğun hesab edib. Ona görə də CM-nin 70-ci (şərti məhkum etmə) maddəsinin tətbiqini təklif edib. Prokuror AXCP funksionerlərindən Qəhrəmanlı və İbrahimə 4 il 6 ay, İmanov və Məhərrəmliyə 4 il, digər təqsirləndirilən şəxslərə isə 3 il 6 ay şərti cəza verilməsini istəyib.
Bəraət hökmü istəyiblər
Vəkillər, ardınca son sözünü deyən təqsirləndirilən şəxslər ittihamların sübuta yetirilməsi haqda prokurorun dediklərinə etiraz ediblər. Onlar bəraət hökmü istəyiblər.
Qəhrəmanlı son sözündə bildirib ki, prokurorun çıxışı ittiham aktında yazılanların təkrarı idi: “Bu da onu göstərir ki, məhkəmə formal keçirilirdi. Prokuror çıxışında videogörüntülərə istinad etdi, zorakılıq olduğunu bildirdi. Məhkəmədə nümayiş etdirilən görüntülərin heç birində isə zorakılıq yox idi. Ümumiyyətlə, bu ittiham heç bir hüquqa, heç bir arqumentə söykənmir. Bu ittiham hüququn hörmətdən salınmasıdır. Bu cür iddialarla insanların məhkum edilməsi hüquqa təcavüzdür”.
Təqsirləndirilən şəxslərin son sözündən sonra Səbail rayon Məhkəməsinin sədri Ağamalı Qafarov hökm çıxarmaq üçün müşavirəyə gedib.
Azadlıq radiosu