“Bu cür münasibət davam etsə, Azərbaycan Avropa Parlamenti və Avronest-lə əməkdaşlıq məsəsinə yenidən baxacaq”
Milli Məclis Avropa Parlamentinin Azərbaycana qarşı qəbul etdiyi qətnmaməyə etiraz əlaməti olaraq bəyanat verib. Bəyanat haqqında məlumat verən deputat Məlahət İbrahimqızı bildirib ki, Avropa Parlamentinin Azərbaycanda demokratiya və insan haqları ilə bağlı qəbul etdiyi qətnamə məntiqsiz və qeyri-obyektivdir.
Bəyanatda bildirilir ki, Avropa Parlamentinin qətnaməsi hazırlanarkən Azərbaycanla bağlı obyektiv araşdırma aparılmayıb.
“Avropa Parlamentinin 2014-cü il sentyabr 18 tarixli qətnaməsi qərəzlidir. Milli Məclis bəyan edir ki, bu cür münasibət davam etsə, Azərbaycan Avropa Parlamenti və Avronest-lə əməkdaşlıq məsələlərinə yenidən baxmalı olacaq”,-deyə Məlahət İbrahimqızı bəyanat haqqında məlumat verib (Modern.az).
***
13:05
Milli Məclisin sədri Oqtay Əsədov parlamentin payız sessiyisanın ilk iclasında Avropa Parlamentinin Azərbaycana qarşı qəbul etdiyi qətnaməyə münasibət bildirib.
“Qafqazinfo”nun məlumatına görə, O.Əsədov bildirib ki, sessiyaya başlamazdan əvvəl Avropa Parlamenti tərəfindən Azərbaycana qarşı qeyri-obyektiv qətnamə qəbul edib:
“Bu, Avropa Parlamenti tərəfindən Azərbaycana qarşı adət şəklini alıb və qəbul edilmiş 4- cü qətnamədir. Diqqətinizə çatdırım ki, sentyabrın 18-də qətnamə qəbul olundu, 22-də isə PA-nın sədri Azərbaycana gəlib. Azərbaycana qarşı bu qətnamənin qəbul edilməsinin mahiyyətini dünya başa düşdü. Qətnamənin müəllifləri 46 nəfərdir. Onlardan 45-i Azərbaycanda olmayıb. Bir nəfər isə Slovakiyanın keçmiş Xarici işlər naziri olub. Onun dövründə Slovakiya tərəfindən Ermənistana təyyarə satılmışdı. 46 deputatın təklifi ilə səsvermə keçirilib. Bu onu göstərir ki, Azərbaycana təzyiq var. Mən inanıram ki, dövlət başçısının apardığı siyasət düzgün siyasətdir. Heç bir kənar qüvvə də bu siyasətə təsir edə bilməyəcək. Azərbaycan parlamentinin Avropa parlamenti qarşısında öhdəliyi yoxdur, sadəcə əməkdaşlıq edir. Biz əməkdaşlığı inkişaf etdirmək üçün Avronest PA-nı yaratdıq. Onlar istədikləri qeyri-obyektiv qətnaməni qəbul edirlər. Mən təklif edirəm ki , komissiya yaradılsın. Onlara qarşı fikrimizi bildirək. Günün sonuna kimi bəyanat hazırlayıb səsləndirək. Belə hadisələr davam edərsə, gələcəkdə bu təşkilatla işləməyin nə mənası var? Hər dəfə nə qədər can atırıq ki, onlarla işləyək, amma bizə qarşı belə münasibətlər var.
Avropa Parlamenti Azərbaycana hücuma keçib. Azərbaycanda qrantlar verirlər və onların qarşısına tələblər qoyulur. Bəziləri də bu pullardan istifadə edərkən vergidən də qaçır. Nəyə görə Avropa Parlamenti Azərbaycanın daxili işlərinə qarışır? Sən kimsən ki, Azərbaycanla belə danışırsan?”
