İsveçin İnsan Haqları Müdafiəçiləri təşkilatı Azərbaycan hakimiyyətini son günlərdə həbs edilmiş hüquq müdafiəçilərini dərhal azadlığa buraxmağa çağırır. Təşkilatın avqustun 17-də yaydığı bəyanatda bildirilir ki, Avropa Şurasında sədrliyə baxmayaraq Əliyev rejimi Azərbaycanda vətəndaş cəmiyyətinə təzyiqləri daha da gücləndirir.
Təşkilatın icraçı direktoru Robert Hardın imzaladığı müraciətdə deyilir ki, üzərinə beynəlxalq öhdəliklər götürən Azərbaycan hakimiyyəti Rəsul Cəfərovu, İntiqam Əliyevi, Leyla və Arif Yunusovları qeyd-şərtsiz azad etməlidir.
Təşkilat iki gün əvvəl, avqustun 15-də də Azərbaycan prezidenti İlham Əliyevə, Ədliyyə naziri Fikrət Məmmədova və Baş prokuror Zakir Qaralova eyni məzmunlu müraciət ünvanlayıb (azadliq.org).
