Rusiya Avropa Şurası Parlament Assambleyası (AŞPA) ilə əməkdaşlığı dayandırıb.
“Media forum” saytının məlumatına görə, bunu Dövlət Dumasının rəsmisi Aleksey Puşkov açıqlayıb.
O bildirib ki, Rusiya nümayəndə heyəti AŞPA-nın bu ay keçiriləcək iclasında iştirak etməyəcək: “Biz assambleya ilə əməkdaşlığı müvəqqəti – nümayəndə heyətimizə qarşı sanksiyalar aradan götürülənə qədər dayandırırıq”.
AŞPA-nın 9 aprel iclasında “Ukraynada son vəziyyət: demokratik təsisatların fəaliyyəti təhlükədə” məsələsi müzakirə olunub. Sonda Ukraynanın ərazi bütövlüyü ilə bağlı qətnamə layihəsi səsə qoyulub. Avropanın 154 deputatı sənədin lehinə, 29 deputatı əleyhinə səs verib, 10 nəfər isə bitərəf qalıb. Qətnamədə Rusiyanın Ukrayna torpağı Krımı işğal və ilhaq etməsi kəskin pislənib, işğalçı qoşunların Ukraynadan çıxarılması tələb olunub.
Aprelin 10-da isə Krım hadisələrinə görə rusiyalı deputatlar 2014-cü ilin sonuna kimi AŞPA-da səsvermə hüququndan məhrum edilib.
