Rusiya DİN rəhbəri: «Təxribatçılar Biryulevodakı hadisələrdən istifadə etdilər”
Moskvada miqrantlara qarşı yeni reydlərə start verilib. Polis qeyri-leqal miqrantları, «narkodilleri» və qanunsuz silah satışı ilə məşğul olanları saxlamaq üçün əməliyyatlar keçirib. Onlar paytaxtdakı bir zavodda da axtarış aparıblar. Zavodun bütün anbarların və zirzəmilərin giriş-çıxışları yoxlanılıb. Bundan əvvəl polis paytaxtın ən böyük bazarlarından olan «Sadavod»da reydlər keçirərək xeyli miqdarda saxta mal aşkar etmişdi. Azərbaycandan olan sahibkara məxsus «Sadavod» Moskvanın ən böyük geyim bazarlarından biridir.
“Cəmiyyətdə millətçi duyğuların inkişafı ekstremistlərin fəaliyyəti üçün münbit şərait yaradır”. Bunu Rusiyanın daxili işlər naziri Vladimir Kolokoltsev Federasiya Şurasında çıxışı zamanı deyib(APA). O bildirib ki, bu halda məişət zəminində baş verən hər hansı bir cinayət və ya münaqişə etiraz aksiyalarına, yaxud kütləvi davaya səbəb olur: “Moskvanın Qərbi Biryulevo rayonunda baş verən hadisələr, insanların etiraz aksiyası keçirməsi buna misaldır. Rayon sakinlərinin qətlə yetirilənin ailəsinə dəstək olmaq arzusu və yerli hakimiyyətdən narazılığı təxribatçılar tərəfindən istifadə olundu”.
Nazir ekstremist fəaliyyətə maliyyə ayıranların cinayət məsuliyyətinə cəlb olunmasını da təklif edib: “Bu kimi halların qarşısını onları maliyyələşdirənləri cinayət məsuliyyətinə cəlb etməklə almaq olar. Ona görə də sizdən xahiş edirəm ki, ekstremist fəaliyyəti maliyyələşdirənlərin cinayət məsuliyyətinə cəlb olunması haqqında qanun layihəsini qəbul edəsiniz”.
Polis rəisi Biryulevo olaylarına görə işdən çıxarıldı
Moskva şəhərinin Cənub Federal Dairəsinin polis rəisi vəzifəsindən çıxarılıb. Kremlin mətbuat xidmətinin yaydığı məlumatda bildirilir ki, prezidentin imzaladığı əmrlə Moskva şəhərinin Cənub Federal Dairəsinin polis rəisi, general-mayor Aleksandr Podolnıy tutduğu vəzifədən azad olunub. A.Podpolnıy bu vəzifəyə 2011-ci ilin iyun ayında təyinat alıb. Onun Qərbi Biryulevoda baş verən iğtişaşlarla bağlı vəzifəsindən çıxarıldığı bildirilib.
Şeyx Orxan Zeynalovun işi ilə bağlı patriarx Kirillə görüşəcək
Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə Rusiyada Azərbaycan vətəndaşı Orxan Zeynalov ətrafında baş verən hadisələrə münasibət bildirib. Allahşükür Paşazadə bildirib ki, bu məsələ ilə bağlı Rusiyanın Azərbaycandakı səfiri Vladimir Doroxin və Moskva və bütün rusların Patriarxı Kirillə ayrı-ayrılıqda görüşü olacaq. Görüşlərində hadisə ilə əlaqədar yaranmış gərginliyin səngidilməsinə çalışacağını deyən Şeyx xüsusi vurğulayıb ki, azərbaycanlılara, eləcə də digər qeyri-rus xalqlarına qarşı baş verən arzuolunmaz hadisələrin dövlət səviyyəsində təşkil olunmasına inanmır: “Sadəcə, hər dövlət öz qanunlarına tələb olunmasını istəyir, biz də bunun əleyhinə deyilik. Məsələn, dövlət istəyirsə hansısa bazarı söksün, bu, artıq onun öz qərarıdır, daxili işidir. Amma burada hər şey – bazarın sökülməsi, orada işləyənlərin çıxarılması, deportasiyası və sair təbii ki, qanun çərçivəsində aparılmalıdır. Biz də yeri gələndə deportasiya edirik, amma hər şey qanunun tələblərinə uyğun olur”.
A. Paşazadə vurğulayıb ki, Rusiyanın dövlət səviyyəsində azərbaycanlılara qarşı neqativ hərəkətini görmür: “Bunu müxtəlif görüşlərdə, o cümlədən bu yaxınlarda Ufa şəhərində keçirilən tədbirdə də gördüm. Prezident Vladimir Putin də orada idi və Azərbaycan xalqına, ümumiyyətlə müsəlmanlara qarşı böyük hörmət nümayiş olundu. Bunun əksini, ayrı-seçkilik görsəydim, təbii ki, cavab verərdim, axı mən də azərbaycanlıyam, müsəlmanam”. O.Zeynalovun həbsinə toxunan Şeyx bildirib ki, cinayətkarın milliyyəti, dini olmur: “Əgər bir adam cinayət törədibsə, əməli sübuta yetirilibsə, qanun qarşısında cavab verməlidir. Amma bunun hansı formada olması, əməli sübuta yetirilməsi və sair də qanun çərçivəsində olmalıdır”.
Şeyx bu hadisələr ərəfəsində Rusiya Dövlət Dumasının üzvü, Liberal Demokrat Partiyasının sədri Vladimir Jirinovskinin azərbaycanlılarla, ümumiyyətlə qafqazlılarla bağlı verdiyi bəyanata da etiraz edib: “Jirinovskinin çıxışı mənə vaxtı ilə prezident Boris Yeltsinin çeçen xalqına olan münasibətini xatırlatdı. Yeltsinin dövründə Rusiyadan olan bir həkim mənə dəhşətli bir fakt söyləmişdi. Demişdi ki, onlara qafqazlılardan olan uşaqlara elə iynələr vurmaq tapşırılıb ki, nəsil tamam kəsilsin. O vaxt bu genosid siyasətinə qarşı mənim rəsmi müraciətim də olmuşdu. İndi Jirinovskinin hərəkətləri göstərir ki, həmin komandadan olan jirinovskilər hələ də var və öz siyasətlərini davam etdirirlər. Amma bu adamlar heç Rusiya dövlətinə də lazım deyillər. Çünki onlar dövlətlər, xalqlar, dinlər arasında ancaq qarışıqlıq yaradırlar ki, bundan da heç kim xeyir görməz. Bunlar kiminsə bığının altından keçərək mal-dövlət sahibi olublar. İnanmıram ki, bu adamlar böyük dövlətlər səviyyəsində maraqlara cavab versin. Çünki bu yaxınlarda Putinin Bakıya gəlməsi, seçkilərdən sonra ilk olaraq prezidentimizi təbrik etməsi, Minskdəki görüşlər və sair göstərir ki, iki dövlət arasında heç bir problem yoxdur. Sadəcə, daxildə bəzi qüvvələr var ki, bunlar tək azərbaycanlılara, o cümlədən digər xalqlara yox, həm də Rusiyanın özünə qarşıdırlar”.
