“Məmmədbağır ermənilərə nifrət edirdi, Azərbaycan torpaqlarının erməni işğalından azad olunmasını istəyirdi. Oğlum heç vaxt ermənilərə könüllü əsir düşməz”. Bunu APA-nın cənub bürosuna açıqlamasında Azərbaycan Ordusunun ermənilər tərəfindən əsir götürülən kiçik çavuşu Məmmədbağır Axundzadənin atası Talıb Axundov deyib.
T. Axundov oğlunun ötən il dekabrın 7-də məzuniyyətə gəldiyini, məzuniyyəti başa vurandan sonra yenidən hərbi hissəyə qayıtdığını bildirib.
Onun sözlərinə görə, ailədə böyük övlad olan Məmmədbağır 2010-cu ilin iyul ayına kimi Sərhəd Qoşunlarında həqiqi hərbi xidmət keçib: “Sonra isə öz arzusu ilə müddətdən artıq xidmət edən çavuş kimi Tərtərdəki hərbi hissədə xidmətə başladı. Onun könüllü olaraq ermənilər tərəfə keçməsi barədə deyilənlər yalandır. Məmmədbağır Vətənini sevməsəydi, hərbi xidmətini başa vurandan sonra yenindən ordu sıralarına qayıtmazdı”.
Atası onu da bildirib ki, oğlunun yanvarın 23-də əsir götürülməsi barədə onlara xidmət etdiyi korpusun komandanlığından məlumat verilib.
Qeyd edək ki, Azərbaycan Ordusunun kiçik çavuşu, 1990-cı il təvəllüdlü Axundzadə Məmmədbağır Talıb oğlu Azərbaycan-Ermənistan qoşunlarının təmas xəttində, Tərtər rayonunun Yuxarı Çaylı kəndi yaxınlığında ermənilər tərəfindən əsir götürülüb. Azərbaycan Müdafiə Nazirliyi hərbçinin ermənilər tərəfindən əsir götürülməsi faktını təsdiqləyib.
***
24.01.2012
Aəzrbaycan əsgəri əsir düşdü
Yanvarın 23-də saat 15:30 radələrində təmas xəttində Azərbaycan vətəndaşı ermənilər tərəfindən əsir götürülüb. Bu barədə “Regnum” agentliyinin yaydığı xəbərdə bildirilir ki, əsir götürülən azərbaycanlı hərbi geyimdə olsa da, onun üstündə fərqlənmə nişanları olmayıb. Lakin üzərindən tapılan hərbi biletdən məlum olub ki, əsir götürülən şəxs 1990-cı il təvəllüdlü Axundzadə Məmmədbağır Talıb oğludur. Lənkəran sakini olan Məmmədbağır Axundzadə kiçik çavuşdur.
Xankəndidən “Regnum”a verilən xəbərdə o da qeyd olunub ki, artıq hadisə barədə Beynəlxalq Qırmızı Xaç Komitəsinə və ATƏT-in yerli nümayəndəliyinə məlumat çatdırılıb.
