Azərbaycanda qanunsuz sahibkarlığa qarşı sanksiyalar ağırlaşdırılıb
Azərbaycanda qanunsuz sahibkarlıq fəaliyyəti ilə məşğul olan şəxslərə qarşı sanksiyalar ciddiləşdirilib. Bu barədə APA-ya vergilər naziri Fazil Məmmədov məlumat verib.
Yeni tədbirlər vergilər nazirinin “Vergi orqanlarında uçota alınmadan sahibkarlıq fəaliyyəti ilə məşğul olan şəxslərin məsuliyyətə cəlb olunması barədə” əmrində əksini tapıb. F.Məmmədovun sözlərinə görə, qanunsuz sahibkarlıq fəaliyyətinə görə cərimələr Inzibati Xətalar Məcəlləsində indi də nəzərdə tutulur: “Burada cərimənin məbləği təqribən 40 manat təşkil edir”. Yeni əmrə görə isə, belə sahibkarlara cərimədən vergi qanunvericiliyindəki sanksiyalar da tətbiq olunacaq. “Məsələn, indi qanunsuz sahibkarlıq fəaliyyəti ilə məşğul olub, eyni zamanda kassa aparatlarından istifadə etməyən şəxslər müvafiq olaraq adi vergi ödəyiciləri kimi 400 manat, 800 manat və 1200 manat məbləğində cərimələnəcəklər”, – deyə nazir vurğulayıb.
