Azərbaycanın 4500 kəndində qəzet köşkü yoxdur
Bir qrup KIV rəhbəri çap məhsullarının yayımında yaranmış böhranlı vəziyyətlə bağlı prezident Ilham Əliyevə məktub göndərib. Məktubda qeyd olunur ki, bir çox illərdir ki, çap məhsullarının yayım sistemində mövcud problemlər ağırlaşmaqda davam edir. Belə ki, son vaxtlar Bakı, Gəncə və Sumqayıtda “abadlaşdırma” adı altında qəzet köşkləri yığışdırılır. Kənd yerlərində vəziyyət daha gərgindir, orada ümumiyyətlə köşk yoxdur.
Yerli icra orqanları çap məhsullarının küçə satışı ilə məşğul olanlara ciddi maneə yaradır, supermarketlərdə müstəqil və müxalifət qəzetlərinin satışını qadağan edir.
Redaktorlar Əliyevdən xahiş edirlər ki, problemin həlli məqsədilə məsələyə müdaxilə etsin. KIV rəhbərləri hakimiyyət nümayəndələri ilə birlikdə KIV-in yayım sahəsinin sağlamlaşdırılması üçün xüsusi siyasət həyata keçirməyə hazırdır. Son vaxtlar Bakının mərkəzində abadlaşdırma adı altında 20 köşk yığışdırılıb. Onlardan yalnız 5-i quraşdırılıb. Gəncədə 22, Sumqayıtda 12 köşk götürülüb. Onların hamısı dövlətin nəzarətində olan “Qasid” və “Mətbuat yayımı” səhmdar firmalarına məxsusdur. Nəcəf Nəcəfov Fondunun araşdırmalarına görə, Azərbaycanda 14 min nəfərə bir köşk düşür, halbuki, beynəlxalq normaya əsasən 2 min nəfərə 1 köşk nəzərdə tutulur. 2010-cu ilin əvvəlində ölkədə 637 köşk, marketlərdə 100 satış nöqtəsi, 60 küçə satışı subyekti olub. Azərbaycanda bir köşk 15 min nəfərə Almaniyada 1000 nəfərə, Çexiyada – 1200, ABŞ-da 1500 nəfərə xidmət göstərir. Rusiyada 1 köşkə 3000 nəfər düşür. Bundan əlavə, Azərbaycanın 4500 kəndinin heç birində qəzet köşkü yoxdur. Bakıda qəzet satışı ilə deyil, qida məhsullarının satışı ilə məşğul olan yeni köşklər “Xəzər” şirkətinə məxsusdur ki, bunun da arxasında Əli Həsənov durur(Turan).
