Ölənlər 1300 nəfəri keçib
Bu gün səhər Yaponiyanın “Fukusima-1” atom elektrik stansiyasında güclü partlayış baş verib. Bu barədə yerli KİV məlumat yayıb.
Yaponiyanın “NHK” telekanalının kadrlarında AES-in nüvə reaktorunun bloklarından birinin çöl divarı dağıldığı və stansiya üstündən güclü tüstü çıxdığı görünüb.
Telekanal həmçinin bildirib ki, partlayış nəticəsində stansiyanın əməkdaşları arasında xəsarət alanlar var. İlkin məlumata görə onların sayı 4-dür.
Yaponiya höluməti isə AES-dəki partlayışdan sonra vətəndaşlardan evlərindən çölə çıxmamağı xahiş edib.
Belə ki, AES-lə sərhəddə radiasiya fonu yüksəlməyə başlayıb. Hakimiyyət sakinləri pəncərəni və kondisionerləri də bağlamağı tapşırıb.
Artıq Yaponiya hökuməti AES-dən 10 km radiusda məskunlaşmış əhalinin evakuasiyası barədə əmr verib.
Qeyd edək ki, əvvəlcə Yaponiya KİV-i stansiyada radiasıya sızıntısı olduğunu bildirmişdilər. Daha sonra isə Yaponiya hökuməti bu məlumatı təkzib edərək, bildirmişdilər ki, radiasiya sızıntısı olmayıb. Buna baxmayaraq, “Fukisima-1” atom elektrik stansiyası yaxınlığında məskunlaşan 3 minə yaxın insan evakuasiyası elan edilmişdi.
Xatırladaq ki, ötən gün Yaponiyada baş verən 8.9 bal gücündəki zəlzələ nəticəsində ölənlərin sayı 1300 nəfəri ötüb. Bu barədə məlumatı ölkənin Baş Polis İdarəsi yayıb.Yaponiya hökuməti isə indiyə kimi 573 nəfərin ölməsi faktını təsdiq edib və onların rəsmi məlumatına əsasən 740 nəfər itkin düşüb.
Ölkənin şimal-şərqindəki yaşayış məntəqələrində yaşayan əhalinin əksər hissəsi sunami və torpaq sürüşməsinin təsirinə məruz qalıb. Zəlzələ və onun ardınca gələn sunami dağıntılara səbəb olub. Hava və dəmir yol nəqliyyatı iflic olub. Çox sayda uçuş və qatar təxirə salınıb. Hava limanları və vağzallarda çoxlu sayda insan qalıb.
Ölkənin şimal qərbində dağlıq hissələrdə yeni yeraltı təkanlar hiss edilib. Bu dəfəki təkanların gücü rixter şkalası üzrə 6.6 bal təşkil edib, sunami və ya itki barədə məlumat yoxdur. Yaponiya hökuməti zəlzələnin nəticələrinin aradan qaldırılması proesinə 8 min nəfərlik ordunu cəlb edib və Birləşmiş Ştatlardan hərbi yardım istəyib.
Amerika qitəsinin bir sıra ölkələrində sunami təhlükəsi barədə xəbərdarlıq edilib. Dalğalar Birləşmiş Ştatların qərb sahili, Havay adalarına və Kanadanın Sakit okean sahillərinə çatıb. Kaliforniyadan Vaşinqtona qədər evakuasiya elan edilib. 5 nəfərin itkin düşdüyü deyilir. Ekvador, Kolumbiya, Çili və Peru prezidentləri ölkələrində həyacan elan edərək sakit okean sahillərində məskunlaşan vətəndaşlarının evakuasiyası barədə qərar qəbul edib. Analoji qərarı Kosta-Rika, Honduras, Qvatemala, Nikaraqua və Panama hökumətləri də qəbul edib.
ABŞ Yaponiyadakı dağıdıcı zəlzələnin nəticələrinin aradan qaldırılmasına yardım etmək məqsədilə bu ölkəyə 6 hərbi gəmi, əsasən “Ronald Reyqan” gəmilərini göndərib. Bundan başqa, Birləşmiş Ştatlar prezidenti Barak Obama Yaponiyada baş vermiş zəlzələ və sunami nəticəsində çox sayda insan tələfatı ilə əlaqədar yapon xalqına başsağlığı verib.
“Bizim fikirlərimiz və dualarımız yapon xalqınadır. Bu faciəvi bir fəlakətdir. Mən bu səhər baş nazir Kan ilə telefon danışığımda Amerika xalqı adından təbii fəlakət qurbanlarının ailəsinə və yaxınlarına başsağlığı verdim və yapon dostlarımıza köməyimizi təklif etdim”,- deyə Barak Obama bildirib (ans press).
