Ən çox şikayətlər Vergilər, İqtisadi İnkişaf, Daxili İşlər və Təhsil nazirliklərinə olur
Korrupsiyaya qarşı elan olunmuş mübarizənin fonunda nazirliklərin “qaynar xətt”nin necə fəaliyyət göstərdikləri də istər-istəməz gündəmə gəlir. Bu xidmətlər vətəndaşın dövlət orqanı ilə əlaqə saxlamasına kömək etməlidir. Azərbaycanda bu istiqamətdə ciddi problemin olduğu, vətəndaşların bir sıra dövlət strukturlarına etimad göstərmədiyi nəzərə alınarsa, “qaynar xətt”lərin necə işlədiyi maraq doğurmaya bilməz.
Modern.az saytının məlumatına görə, məsələn, Daxili Işlər Nazirliyinin “102 zəng xidməti”nə son iki ay ərzində 7251 müraciət daxil olub. Müraciətlərin məzmunu isə daha çox məişət zəminlidir. Bu barədə Daxili Işlər Nazirliyinin mətbuat xidmətinin şöbə rəisi Orxan Mansurzadə məlumat verib. O.Mansurzadənin sözlərinə görə, vətəndaşlar müxtəlif hüquqpozmalar, kiriminal xarakterli məlumatlar, polis fəaliyyəti ilə bağlı istənilən məsələ ilə əlaqədar sutka ərzində “102 zəng mərkəzi”nə müraciət edə bilərlər. Onun sözlərinə görə, ötən il “102 xidməti”nə 42 minə yaxın müxtəlif xarakterli məlumat daxil olub. Bunlar yol nəqliyat hadisələrini, müxtəlif hüquqpozmaları, vətəndaşların üzləşdiyi digər problemləri əhatə edir. Bunlardan 1679-u üzrə cinayət işi başlanıb, məişət zəminli 2 minə yaxın hüquqazidd əməlin isə qarşısı alınıb.
İqtisadi İnkişaf Nazirliyinin “qaynar xətti”nə isə iki ay ərzində 7800 müraciət daxil olub. Bu barədə isə nazirliyin mətbuat xidmətinin rəhbəri Abbas Əliyev məlumat verib. Onun sözlərinə görə, müraciətlər daha çox korporativ idarəetmə, iqtisadiyyat, dövlət investisiyaları, xarici iqtisadi əlaqələr, xarici ticarət siyasəti və bu kimi sahələri əhatə edib. Onu da qeyd edək ki, Iqtisadi Inkişaf Nazirliyinin “qaynar xətti” 195-2-dir.
Vergilər Nazirliyinin “qaynar xətt” xidmətinə yanvar ayı ərzində 28101 müraciət daxil olub. Nazirliyin Analitik informasiya mərkəzindən verilən məlumata görə, nazirliklə canlı əlaqə və avtomatik əlaqə qurmaq mümkündür. Müraciətlərin çoxu avtomatik rejimdə qəbul olunub. Analitik informasiya mərkəzinin məlumatına görə, avtomatik rejimə daxil olan müraciətlərin 19,1%-i büdcə və vergi borcu, 80,9 %-i digər vergi məsələlərini əhatə edir.
Nazirliklə canlı bağlantı quraraq ünvanlanan sualların 41%-i elektron xidmətlər, 28,1%-i hesabat və bəyyannamələrin doldurulması, 13,2%-i vergi növlərini, 5,8%-i qeydiyat məsələlərini əhatə edir.
Nazirliyin “qaynar xətti” olan 195-ə şikayət və ərizələr də daxil olur. Yanvar ayı ərzində 15 ərizə, 4 şikayət daxil olub. Analitik informasiya mərkəzinin məlumatına görə, ərizələr və şikayətlər araşdırılır və həllinə çalışılır.
Amma “qaynar xətt”ində problemlər olanlar da az deyil. Qəzetimizin apardığı araşdırma zamanı məlum oldu ki, məsələn, Baş Prokurorluğun korrupsiya ilə mübarizə aparmaq üçün açdığı “qaynar xətt” işləmir. Belə ki, Baş Prokurorluğun rəsmi internet saytında bildirilir ki, vətəndaşlar martın 3-dən etibarən 161 nömrəli telefona zəng edərək korrupsiya faktları barədə məlumat verə bilərlər. Bu xəbər yayılandan sonra qəzetimizə müxtəlif bölgələrdən şikayətlər gəlməyə başladı. Şikayətçilərin əksəriyyəti “Qaynar xətt”dən onların zənglərinə heç kəsin cavab vermədiyini bildirirdilər. Bizim də 3 gün ərzində 161 nömrəsinə zənglərimiz bir nəticə vermədi.
Ekologiya və Təbii Sərvətlər Nazirliyinin “qaynar xətti”ndə isə qəzetimizə bildirdilər ki, onlar gün ərzində təxminən ona yaxın telefon zəngi qəbul edirlər. Zənglərin mahiyyətinə gəlincə, onlar əsasən qəza halında olan ağaclarla bağlı olur.
Təhsil Nazirliyinin “qaynar xətt”inə müraciətlərin 90 faizi isə informasiya almaq məqsədilə olur. Bu barədə bizə xəttin əməkdaşı məlumat verdi. Onun sözlərinə görə, yerdə qalan 10 faizi isə orta ümumtəhsil məktəblərindəki neqativ hallar təşkil edir. Bura həm bəzi məktəblərdə pulsuz kitabların verilməsi ilə bağlı nöqsanlar, həm də bayramlar öncəsi bir sıra məktəblərdə pul yığılması təşkil edir. Məsələn, hazırda “qaynar xətt”imizə edilən zənglərin bir qismi 8 mart bayramına həsr olunub. Təbii ki, biz bütün bunlarla bağlı müvafiq tədbirlər görürük”. Gün ərzində təxminən 100-200 zəng qəbul edən “qaynar xətt”, “pik vaxtlarda” 400 zəngə cavab verir. Xidmətin əməkdaşının sözlərinə görə, təəssüf ki, “qaynar xətt”ə zəng vuranların əksəriyyəti özünü təqdim etməkdən çəkinir.
“Azəriqazın” 185 saylı “qaynar xətt”inin iş qrafikindəki gərginlik isə fəsildən birbaşa asılıdır. Bu xidmətdən isə bizə bildirdilər ki, qış aylarında xidmətə gündəlik zənglərin sayı təxminən 60-70 nəfər olur. Müraciətlərin mahiyyətinə gəlincə, onlar son zamanlar əhalinin yeni smart kartlarla bağlı üzləşdiyi çətinliklər, qaz təchizatındakı problemlərlə bağlı olur.
Səhiyyə Nazirliyinin “qaynar xətt”i isə digərlərindən fərqli olaraq, bizə hər hansı məlumatı verməkdən imtina etdi və bunun üçün mətbuat xidmətinə müraciət etməyi məsləhət gördü. Gün ərzində mətbuat xidməti ilə əlaqə yaratmaq cəhdlərimiz isə nəticə vermədi. Onu da qeyd etməyi özümüzə borc bilirik ki, digər “qaynar xətt”in əməkdaşlarından fərqli olaraq Səhiyyə Nazirliyindəki xidmətin əməkdaşı nədənsə bizim suallarımıza dözümlü yanaşmadı. Bu xidmətə zəng vuran jurnalistin kobud rəftarla üzləşdiyi nəzərə alınarsa, adi vətəndaşın hansı sürprizlərlə üzləşəcəyi barədə yalnız mülahizə yürütmək olar.
Hikmət
