«Azəryolservis» də Nəqliyyat Nazirliyinin tabeliyindən çıxarıldı
Ölkə başçısı Ilham Əliyev “Azərbaycan Respublikasının nəqliyyat-yol kompleksində idarəetmənin təkmilləşdirilməsi tədbirləri haqqında” Azərbaycan Respublikası Prezidentinin 2007-ci il 22 fevral tarixli 1992 nömrəli Sərəncamında dəyişikliklər edilməsi barədə sərəncam imzalayıb. Bu sərəncamla “Azəryolservis” Açıq Səhmdar Cəmiyyəti (ASC) Nəqliyyat Nazirliyinin tabeliyindən çıxarılıb. Sərəncamda həmçinin qeyd edilir ki, Nəqliyyat Nazirliyinin balansında olan avtomobil yolları bir ay müddətində “Azəryolservis” ASC-nin balansına verilsin.
“Azəryolervis” ASC-yə sədrinə gəlincə, bu posta Saleh Məmmədov təyin edilib. Saleh Məmmədov bundan əvvəl sədrin səlahiyyətlərini icra edirdi.
Beləliklə, faktiki olaraq nəqliyyat naziri Ziya Məmmədov səlahiyyətsiz qaldı. Bundan əvvəl “Azərbaycan Dəmir Yolları” QSC Nəqliyyat Nazirliyindən tabeliyindən çıxarılmışdı. Həmçinin taksilərə lisenziya verilməsi, sərnişidaşıma Nəqliyyat Nazirliyindən alınıb. Bu günlərdə isə Bakı Nəqliyyat Agentliyi yaradılıb. Nəqliyyat Nazirliyindəki Avtonəqliyyat Xidmətinin sərnişindaşıma ilə bağlı və Nəqliyyatın Intellektual Idarəetmə Mərkəzinin funksiyaları da yeni quruma verilib.
Ekspertlər hesab edir ki, bu proses Nəqliyyat Nazirliyinin ləğvi ilə bağlı planın tərkib hissəsi ola bilər. Hələ nəqliyyat naziri Ziya Məmmədov hədəfə gələndə Nəqliyyat Nazirliyinin ləğv ediləcəyi barədə məlumatlar yayılmışdı.