Dövlətlərə öz vətəndaşlarının kompüterlərinə virus salıb, onları izləməsi üçün virus satan şirkət "HackingTeam"in özünə haker hücumu edilib.
Hakerlər 500 GBdan çox məlumat yayıblar. Bu şirkətin aktiv müştəriləri arasında Azərbaycan Müdafiə Nazirliyi də var.
AZƏRBAYCANIN MÜDAFİƏ NAZİRLİYİ VƏ FBI
"Hacking Team" italyan şirkəti polisin vətəndaşlara haker hücumlarına yardım göstərirdi. İndi isə özü hücuma məruz qalıb. Şirkətin tvitter hesabını ələ keçirən naməlum hakerlər daxili yazışmaları, 500GB-lik (theverge.com 400 GB yazır-red.) daxili faylları açıblar.
Hələlik bu hücuma görə heç bir haker qrupu məsuliyyəti üzərinə götürməyib. Yayılmış tvitlərdən birində Hacking Team-in rəhbəri David Vincenzetti rəqibini “ciddi hücuma” məruz qaldığı üçün ələ saldığı görünür.
Hacking Team-in 40-dan çox işçisi var və onlarla ölkədə hüquq mühafizə orqanlarına kommersiya məqsədli haker proqramları satır. Həmin ölkələr içində Mərakeş, Efiopiya, Birləşmiş Ərəb Əmirlikləri, o cümlədən Azərbaycan var. Azərbaycan Müdafiə Nazirliyinin adı şirkətin müştəriləri sırasındadır.
Müştərilər işində ABŞ-ın Federal Təhqiqatlar Bürosu (FBI), Çin, Avstraliya, İspaniya, İraqın adlarına da rast gəlinir.
Hacking Team təhlükəsizlik dairələrində YouTube və Microsoftu-un Live xidmətlərinə virus salmağıyla məşhurdur. Bu şirkəti iki italyan proqramçı yaradıb. Cütlük əvvəlcə Ettercap proqramını yaradıb, bu proqram insanlar üzərində casusluq etmək istəyən hakerlərin əsas silahına çevrilib. Ettercap sonucda Hacking Team-ə (“Hək edən komanda”) çevrilib. İndi isə rəqibləri şirkətin tvitter hesabının adını belə dəyişiblər: Hacked Team- yəni “Hək olunmuş komanda”.
İNSAN HAQLARI QAYDALARI
Hacking Team heç vaxt müştərilərinin siyahısını açıqlamayıb və hökumətlərlə əməkdaşlıq etdiyini yalan adlandırıb. Şirkət insan haqlarıyla bağlı daxili proseduru olduğunu bildirib.
Hələlik hakerlərin nə qədər informasiya əldə etdiyi bəlli deyil, ancaq bir mənbə “Motherboard.vice.com” saytına deyib ki, hakerlər “hər şeyi ələ keçiriblər”.
Təxminən bir il əvvəl FinFisher şirkətinə oxşar hücum olmuşdu. Həmin şirkət də dünyada hüquq mühafizə agentliklərinə kəşfiyyat proqramları satırdı.
İş günü bitdiyi üçün Müdafiə Nazirliyindən xəbərə reaksiya öyrənmək mümkün olmadı.