ARDNŞ-in bu günə olan xarici borcu 1,5 milyardı ötüb

Bu ilin sonunadək ARDNŞ xarici banklardan 500 mln. ABŞ dolları məbləğində kredit cəlb etmək niyyətindədir. Bunu ARDNŞ-ın iqtisadi məsələlər üzrə vitse-prezidenti Süleyman Qasımov bildirib(APA).
Onun sözlərinə görə, xarici banklardan kredit cəlb etmək avrobonddan daha ucuz başa gəlir:"Biz bir sıra xarici banklarla kredit cəlb etmək üçün danışıqlar aparırıq ki, ilin sonunadək ARDNŞ-a 500 mln. dollaradək vəsait lazım olacaq. Bu vəsaitin təxminən 130 mln. dolları Türkiyədə inşa olunacaq “STAR” neft emalı zavoduna yönəldiləcək, vəsaitin qalan hissəsi isə ARDNŞ-ın daxili investisiyaları, Isveçrədə yanacaqdoldurma məntəqələrinin rebrendinqi, Ukraynada apardığımız işlər, Gürcüstanın qazlaşdırılması, həmçinin daxili tələbat üçün lazımdır".
Bu arada məlum olub ki, ARDNŞ-in xarici borcu təxminən 1,6 mlrd. dollar təşkil edir. Qurumun vitse-prezidenti Süleyman Qasımov bildirib ki, ARDNŞ-in bu borcu 5 müəssisəni, o cümlədən “Azneft” IB, iki emal zavodu, marketinq idarəsi və baş ofisi əhatə edir. Borcun strukturuna gəldikdə, buraya 500 mln. dollarlıq avrobond, 500 mln. manatı dövlət təminatı olan borc, hərəsi təxminən 100-150 mln. dollar olmaqla “Natixis Bank” və “Yapi Kredi Bank”a, 60 mln. dollar isə “BNP Paribas” banka olan borclardır. S.Qasımovun sözlərinə görə, hazırda mövcud olan borcun həcmi tam idarə olunandır.