“Bu mükafat bütün siyasi məhbuslara verilir. Kədərli haldır ki, onların hamısının adını burada qeyd etmək mümkün deyil”
Norveç Helsinki Komitəsi 2014-cü il Andrey Saxarov Azadlıq mükafatını Azərbaycandakı siyasi məhbuslara verib. “Onlar böyük cəsarət göstərir və ölkələrində ləyaqət, demokratik dəyərlər və insan haqlarının irəli aparılması üçün böyük işlər görürlər”, – deyə Norveç Helsinki Komitəsinin (NHK) baş katibi Bjorn Enqesland oktyabrın 6-da bəyan edib.
“Bu mükafat bütün siyasi məhbuslara verilir. Kədərli haldır ki, onların hamısının adını burada qeyd etmək mümkün deyil”, – deyə qurumun yaydığı pres-relizdə vurğulanır.
NHK bildirir ki, neft və qazla zəngin Azərbaycanda hakimiyyət illər boyu tənqidçilərini qondarma cinayətlər, uzunmüddətli həbs cəzaları ilə susdurub.
“Yerli insan haqları müdafiəçiləri Avropa Şurasının kriteriyalarına dayanaraq, ölkədə 98 siyasi məhbusun adını müəyyənləşdirib. Bu məhbuslar arasında ən bilikli, təcrübəli insan haqları müdafiəçiləri, jurnalistlər, gənc fəallar və müxalifət siyasətçiləri var. NHK tərəfdarlarından bəziləri həbsdədir. Azərbaycanda vətəndaş cəmiyyəti əzilir və Norveçin tərəfdaş ölkələrindən biri diktaturaya çevrilməkdədir. Norveçin Statoil şirkəti Azərbaycanda ən böyük şirkətlərdən biridir.
Biz bütün siyasi məhbusların yaşadığı dəhşətli durumu tanımaq məsuliyyətini paylaşmalıyıq. Onlara layiq olduğu status verilməlidir. Hakimiyyətdən tələb olunmalıdır ki, məhbuslar azadlığa buraxılsın və qanuni ifadə azadlığına hücumlara son qoyulsun. Avropa institutları və diplomatik cəmiyyət Azərbaycanla bağlı məsuliyyətlərinə hörmət qoymalıdırlar”, – deyə Enqesland bildirib.
Pres-relizdə bildirilir ki, 98 siyasi məhbus içində 13-ü jurnalist və bloqqer, 10 hüquq müdafiəçisi və digər vətəndaş cəmiyyəti fəalı və hüquqşünas, 9 gənc fəal, bir müxalifət lideri və digər tənqidçilər var.
Daha sonra məlumatda həbsdə olan hüquq müdafiəçiləri Leyla Yunus, Arif Yunus, Anar Məmmədli, Bəşir Süleymanlı, Rəsul Cəfərov, İntiqam Əliyev barəsində ətraflı məlumat verilir.
“Avropa Şurası Parlament Asambleyası hələ də Azərbaycanda siyasi məhbuslara dair hesabatı razılaşdıra bilməyib. Yerli hüquq müdafiəçiləri bu işi öz üzərlərinə götürüb. Bu iş çoxlarını həbsxanaya aparıb”, – deyə NHK qeyd edir.
Mükafat noyabrın 13-də Osloda Bristol otelində təqdim olunacaq.
Bu mükafat 1980-ci ildə Norveç Helsinki Komitəsi tərəfindən təsis olunub, ilk dəfə 1984-cü ildə verilib.
2012-ci ildə mükafat Golos seçki monitorinq təşkilatına, Belarusdan olan hüquq müdafiəçisi Ales Bialiatskiyə, Qazaxıstandan hüquq müdafiəçisi Yevgeni Zovtis, Rusiyadan Svetlana Qannuşkinaya verilib.
Bu, Avropa Parlamentinin Fikir Azadlığına görə Saxarov mükafatı ilə səhv salınmamalıdır. Avropa Parlamentinin təsis etdiyi Saxarov mükafatına namizədlər sırasında da hüquq müdafiəçisi Leyla Yunusun adı var. Həmin mükafatın qalibi isə oktyabrın 16-da bilinəcək və təqidmetmə mərasimi noyabrın 26-da Strasburqda olacaq.