Elsevər Abdullayev məhkəmədə: “Nazir müavininə 3 milyon dollar pul vermişik”
«Bir prokurorluq işçisi kimi başa düşdüm ki, bunlarla bacara bilməyəcəyik…»
Fəaliyyəti dayandırılmış Azərbaycan Beynəlxalq Universitetinin (ABU) rektoru, hazırda Fransada mühacirətdə olan Elşad Abdullayevlə bağlı daha bir iş üzrə hazırda Bakı Ağır Cinayətlər Məhkəməsində proses davam edir. Söhbət iş adamı Arzu Kazımovun məhkəməsindən gedir.
Elşad Abdullayev 2003-cü ildə oğurlanmış qardaşı Mahir Abdullayevin tapılması üçün vasitəçilik etmiş Arzu Kazımova 3 milyon dollar pul verdiyini, lakin nə qardaşının, nə də pulun geri qayıtmadığını bildirir. Bu barədə bir neçə video da yayıb.
Arzu Kazımov CM-nin 178.3.2-ci (külli miqdarda ziyan vurmaqla dələduzluq etmə) maddəsilə təqsirləndirilir.
Hakim Əlövsət Abbasovun sədrlik etdiyi məhkəmə prosesində dünən Elşad Abdullayevin qardaşı Ismayıl Abdullayev şahid qismində dindirilib. O bildirib ki, günlərin birində qardaşı ilə söhbətdən sonra ABU-dan evə gedərkən universitetdə bir qadın Elşad Abdullayevlə görüşmək istədiyini, Mahirin işi haqda danışacağını deyib: “Elşad həmin qadını qəbul etdi, sonradan bildim ki, adı Rövşanədir. Bildirdi ki, mötəbər adamla əlaqəsi var və yuxarılarla əlaqəsi olan o adam Mahirin işində kömək edə bilər”.
Ismayıl Abdullayevin sözlərinə görə, həmin qadının vasitəsilə Arzu Kazımovla tanış olublar. Arzu Kazımovun vasitəsilə də daxili işlər nazirinin keçmiş müavini, mərhum Zahid Dünyamalıyevə 3 milyon dollar veriblər. Şahid deyir ki, pulu verəndən sonra nə Arzu Kazımovla, nə də Zahid Dünyamalıyevlə əlaqə saxlamaq mümkün olmayıb: “Bir müddətdən sonra Arzu ilə görüşdük, dedi ki, Zahid müəllimlə danışacam, bu məsələni həll etsin. Bir həftə sonra yenə onun ofisində görüşdük. Yenə də dedi ki, yaxın günlərdə məsələ həll olunacaq”.
Şahidin sözlərinə görə, Mahir tapılmadığını görəndə qardaşı Arzu Kazımovdan pullarını tələb edib: “Arzu Kazımov Mərkəzi Univermağın yanında hündürmərtəbli binadan pulun əvəzində evlərin verilməsini təklif etdi. Elşad qiymətlə bağlı həmin evləri götürməyi razılaşmadı.
Ismayıl Abdullayev onu da bildirdi ki, Arzu Kazımovun vasitəsilə Zahid Dünyamalıyevə pulları hissə-hissə ödəyiblər: “Əvvəlcə 100 min dollar verdik. Sonra Elşad daha 500 min çatdırdı. 500 mini aparanda Elşadla birlikdə mən də olmuşam. Birlikdə Arzu Kazımovun ofisinə getdik. Ofisin qabağında Zahid Dünyamalıyevin də maşını dayanmışdı. Mən həyətdə dayandım, Elşad içəri keçdi. Içəridə Zahid Dünyamalıyev Elşada deyib ki, Mahir sağdır. Bu söhbətdən bir qədər sonra 500 min də istəyiblər. Yenə də 500 mini verdik. Sonuncu dəfə Arzu Kazımov işlə əlaqədar 900 min dollar da lazım olduğunu bildirdi. Həmin pulu daÿ Daxili Işlər Nazirliyinin yaxınlığında yerləşən istirahət mərkəzində Zahid Dünyamalıyevə verdik”.
Arzu Kazımovun vəkili Ramiz Zeynalov Ismayıl Abdullayevin istintaqa ifadəsilə məhkəmədə dedikləri arasında ziddiyyət olduğunu bildirib. Bu səbəbdən onun istintaqa verdiyi ifadə elan olunub.
Ziddiyyətlə bağlı sualları cavablandıran Ismayıl Abdullayev məhkəmədə söylədiklərinin doğru olduğunu deyib.
Elşad Abdullayevin prokurorluq orqanlarında işləyən digər qardaşı Elsevər Abdullayev də dünənki məhkəmə iclasında dindirilib. O bildirib ki, qardaşı itkin düşəndən sonra Elşadla birlikdə prezidentin əmisi, mərhum Aqil Əliyevlə görüşüblər: “Aqil Əliyev Ramil Usubova zəng elədi, bizi qəbul edib bu işin araşdırılmasını istədi. Nazirliyə getdik, Ramil Usubov qəbul etdi. Bizi səmimi qarşılayıb dinlədi, daha sonra Zahid Dünyamalıyevi otağına çağırdı. Bizi ona təqdim etdi və məsələni danışdı. Ramil Usubov Mahirlə bağlı işin araşdırılmasını Zahid Dünyamılıyevə tapşırdı. Bundan sonra Zahid Dünyamalıyevin otağına yollandıq. O, otağında bizə hədə-qorxu gəlməyə başladı. Bildirdi ki, ”bu iş nə qədər kobud olsa da, bir o qədər zərif işdir. “Sığorta Mamed”in oğlu da itkin düşmüşdü, kəsilmiş qulağı tapıldı”. Zahid Dünyamalıyevin bu sözündən sonra ehtiyatlanıb səsimizi çıxarmadıq ki, Mahirə nəsə eləyərlər”.
Elsevər Abdullayev də Zahid Dünyamalıyevə 3 milyon dollar verdiklərini bildirib. Onun sözlərinə görə, nazir müavini onlara Mahirin 10 nəfərlik dəstə tərəfindən oğurlandığını deyib: “Zahid Dünyamalıyev dedi ki, dəstənin hər üzvünə 1 milyon dollar lazımdır ki, Mahir Abdullayev geri qaytarılsın. Bu da 10 milyon dollar edir. Bizdə o qədər pul yox idi. Bir qədər keçəndən sonra bir prokurorluq işçisi kimi başa düşdüm ki, bunlarla bacara bilməyəcəyik, qərara gəldik ki, pullarımızı geri alaq, mümkün olmadı”.
Daha sonra Arzu Kazımovun vəkili Ramiz Zeynalov Elsevər Abdullayevə Mahir Abdullayevin oğurlanması, maşının tapılması, maşında qan izləri və qadına məxsus saçın tapılması haqda suallar verib. Sual-cavabdan aydın oldu ki, sözügedən saç müğənni Mətanət Isgəndərliyə məxsus olub.
Daha sonra şahid qismində Rövşanə Arazxanlı ifadə verib. O bildirib ki, Elşad Abdullayevin digər qardaşı Eldəniz Abdullayevlə 1998-ci ildən tanış olub. Son vaxtlar başına gələnlərə görə Eldəniz Abdullayevi günahlandıran Rövşanə Arazxanlı deyir ki, onun xahişilə onları Arzu Kazımovla tanış edib. O həmçinin Eldəniz Abdullayev tərəfindən təhdid olunduğunu qeyd edib.
Məhkəmə iclası iyulun 16-da Rövşanə Arazxanlının tərəflərin sullarını cavablandırmasıyla davam edəcək.
Aytən Məmmədova