«ABU-nun Tibb Mərkəzində qanunsuz orqan köçürmələri olubsa da, mən məsuliyyət daşımıram, bu mərkəz Ramiz Mehdiyevin qohumunun nəzarətində idi»
Lisenziyası ləğv olunmuş Azərbaycan Beynəlxalq Universitetinin rektoru, hazırda Fransada mühacirətdə yaşayan Elşad Abdullayev rəhbərlik etdiyi universitetin nəzdində fəaliyyət göstərmiş Tibb Mərkəzilə bağlı Baş Prokurorluğun bu yaxınlarda yaydığı məlumatlarda əlaqədar “Azadlıq”a məktub göndərib.
Bugünlərdə saxlanıldığı haqda yayılan xəbərlərə toxunan Elşad Abdullayev bildirir ki, bu məlumatlar həqiqətə uyğun deyil: “Bunu yayanlar mütəşəkkil cinayətkar təşkilatın nümayəndələridir”.
Daha sonra 2003-cü ilin oktyabrında oğurlanmış və bugünədək tapılmayan qardaşı Mahir Abdullayevin işi üzrə prezidentin göstərişilə yaradılmış Müstəqil Istintaq Komissiyasının fəaliyyətindən bəhs edən ABU rektorunun sözlərinə görə, bu qurum cinayətkarları tapmaq yox, onların ifşasının qarşısını almaq yolunu tutub.
Universitetin nəzdindəki Tibb Mərkəzində qanunsuz orqan köçürmələri, həmçinin bununla əlaqədar ABU rektorunun barəsində Nəsimi Rayon Məhkəməsinin qərarı ilə həbsli beynəlxalq axtarış qərarının çıxarılmasına gəlincə, Elşad Abdullayev məktubunda bu məsələyə ətraflı münasibət bildirib: “Tibb Mərkəzinin baş həkimi Dilarə Ismayılova ilə əlaqələrimiz tam hüquqi çərçivədə olub. Bizim lisenziyadan kənar heç bir iş birliyimiz olmayıb. Dilarə Ismayılova müstəqil hüquqi şəxs statusunda olub və ABU Tibb Mərkəzində aparılan bütün tibbi əməliyyatlara görə bilavasitə məsuliyyət daşıyıb.
Dilarə Ismayılovanın ABU Tibb Mərkəzinin baş həkimi kimi fəaliyyəti 21 oktyabr 2010-cu ilə qədər davam edib. O, hətta həmin gün Bakı Şəhər Baş Polis Idarəsinin rəisi Rafiq Abbasova möhürün itməsi haqda Tibb Mərkəzinin baş həkimi kimi əlyazma ilə müraciət edib. Ancaq elə həmin gün fikrini dəyişərək, 3-5 saatdan sonra möhürü təhvil verib. Biz də həmin möhürü Baş Prokurorluğun müstəntiqi Ibrahim Ləmbəranskiyə 23 dekabr 2010-cu ildə təhvil verdik.
Birmənalı şəkildə hesab edirəm ki, Azərbaycan Beynəlxalq Universitetinin Tibb Mərkəzində qara transplantasiya ilə bağlı cinayətlər olmayıb. Bu saxta cinayət işi zərərçəkmiş kimi məni susdurmaq məqsədilə düzüb-qoşulub. Dövlətin gücündən istifadə edərək adam oğurluğu ilə məşğul olan mütəşəkkil cinayətkar təşkilat nəyin bahasına olursa-olsun, cinayətləri ört-basdır etmək yolunu tutub.
Hətta Tibb Mərkəzində qanunsuz orqan köçürməsi olubsa belə, bu işə görə bilavasitə baş həkimi Dilarə Ismayılova məsuliyyət daşıyır.
ABU-da Tibb Mərkəzinə nəzarəti isə Prezident Administrasiyasının rəhbəri Ramiz Mehdiyevin yaxın qohumu, MTN-in idarə rəisi, ixtisasca həkim olan Fikrət Əliyev həyata keçirirdi. 2008-ci ildə qardaşım Eldəniz Abdullayevi “Qurd qapısı” restoranında Sevinc Babayeva sayağı zəhərlədilər və o, Ankara həkimlərinin təcili tibbi yardımı sayəsində həyatda qalsa da, nəticədə normal danışıq və əmək qabiliyyətini itirdi. Ertəsi gün milli təhlükəsizlik nazirinin rəsmi məktubu ilə heç bir elmi dərəcəsi olmayan Fikrət Əliyev ABU-ya ikinci şəxs vəzifəsinə göndərildi.
Fikrət Əliyevin ilk həmləsi ABU-nun Tibb Mərkəzinə oldu, əvvəlcə Tibb Mərkəzinə “KQB” sayağı oyun qurdu. Bir gün baş həkim Dilarə Ismayılova ağlaya-ağlaya mənə zəng edib köməklik istədi. Dedi ki, Mərkəzi dağıdırlar, onun özünü də döyüblər. Məni Tibb Korpusuna buraxmadılar, hətta məni də vurdular. Dedilər ki, Nərimanov rayon Icra Hakimiyyəti başçısının əmrini yerinə yetirirlər. Hadisə yerindəcə Nərimanov Rayon Icra Hakimiyyətinin başçısı ilə telefon əlaqəsi saxladım. O bildirdi ki, belə bir göstərişi olmayıb. Daha sonra Bakı Şəhər Icra Hakimiyyətinin başçısı Hacıbala Abutalıbova zəng etdim. O da bu məsələdən xəbərsiz olduğunu söylədi. Dedi ki, “məni bu işlərə qatmayın”. Düşündüm ki, göstəriş daha yuxarıdan gəlib və bundan sonra Fikrət Əliyevə müraciət etdim ki, sənin qohumun nüfuzlu adamdır, onunla məsələni həll elə. Bundan az sonra bütün kollektivin gözü qarşısında Fikrət Əliyev bu şounu həll etdi. Təsəvvür edin, məni vuranlar gəlib dərhal üzr istədilər.
Bir neçə gün sonra Fikrət Əliyev Azərbaycan Tibb Universitetinin stomotologiya fakültəsinin sonuncu kursunda oxuyan oğlunu mənə təqdim edərək bildirdi ki, onu Tibb Mərkəzinə stajor-stomotoloq təyin edim. Dedi ki, istəyirəm mərkəzə oğlumun vasitəsilə nəzarət edim, yoxsa oranı belə saxlamaq olmaz, batıb gedir. Bundan sonra Fikrət Əliyev ABU Tibb Mərkəzini bilavasitə oğlu vasitəsilə faktiki nəzarətə götürdü.
Daha sonra Fikrət Əliyev və Daxili Işlər Nazirliyinin Ukraynadakı nümayəndəsi, polis polkovniki Zəfər Abıyev (Daşkəsən rayon icra hakimiyyətinin başçısı Əhəd Abıyevin qardaşı) mənə təklif etdilər ki, Kiyev Həkimləri Təkmilləşdirmə Inistitunun Filialını ABU Tibb Mərkəzində yaradaq. O, Kiyevlə bağlı layihəni də təklif etdi. Bildirdi ki, bunun üçün Kiyev şəhərinə gedib müəyyən sənədlərə imza atmalıyam. Hadisələrin bugünkü inkişafı nöqteyi-nəzərindən yanaşsaq, deməli, mən Fikrət Əliyevlə Kiyevə getməli və orada “qara transplantasiya” ilə bağlı əməllərə cəlb olunub, sonradan buna görə həbs edilməli idim. Bununla da ABU ələ keçiriləcəkdi.
Hətta Fikrət Əliyev bir dəfə mənə dedi ki, “Elşad müəllim, Sizi işləməyə qoymurlar, ABU-in təsisçiliyini keçirin mənim adıma, özünüz də qalın rektor kimi”. Mən Fikrət Əliyevə etiraz etdim. Onu ABU-dan qovdum”.
Baş Prokurorluğun məlumatında qeyd olunurdu ki, Kiyev hüquq-mühafizə orqanlarının qanunsuz orqan transplantasiyasıyla bağlı sorğusu əsasında Azərbaycanda bu məsələ ilə əlaqədar araşdırmalar başlanıb. Nəticədə, Dilarə Ismayılova məsuliyyətə cəlb olunub, Elşad Abdullayevin barəsində beynəlxalq axtarış qərarı verilib. Elşad Abdullayev isə deyir ki, Ukraynada avqustun 7-də məhkəmə qərar çıxararaq, bununla bağlı cinayət işinə xitam verib. Amma Azərbaycanda Nəsimi Rayon Məhkəməsi avqustun 20-də onun barəsində həbsli axtarış qərarı verib: “Əvvəla, onların məni beynəlxalq axtarışa verməsi kimi söhbətlərin Fransa və bu kimi dövlətlərdə əhəmiyyəti sıfra bərabərdir. Mənim Adil Ismayılov kimi vəkilim, Azad Mürsəliyev kimi hüquqi nümayəndəm ola-ola guya, mənə dövlət hesabına vəkil təyin ediblər. Bunlar özlərini ifşa edirlər. Dilarənin işi niyə gizli keçirilir? Azərbaycanda hansı xəstəxanaların bu işlə məşğul olduğu hamıya məlumdur. Bunu gizlətmək üçün prosesləri mənə yönəltməyə çalışırlar. Bunların hamısı prezident seçkilərinə hesablanıb. Amma onu da bilsinlər ki, 100 axtarış qərarı olsa belə, yenə də geri çəkilməyəcəm. Mən öz işimlə məşğulam. Bugünlərdə Isveçrədə Avropa Azərbaycanlıları Milli Birlik Şurasının Məclis sədri seçildim”.
Bu arada, Mahir Abdullayevin Hüquqlarının Müdafiə Komitəsinin sədri Azad Mursəliyev də dövlət başçısı Ilham Əliyevə müraciət edib. Müraciətdə qeyd edilir ki, M.Abdullayevin oğurlanma faktıyla bağlı 2003-cü ildən bəri dəfələrlə hüquq-mühafizə orqanlarına göndərilən çoxsaylı müraciətlərə baxmayaraq, bu işin istintaqında heç bir ciddi dəyişiklik olmayıb: “Əksinə, Mahir Abdullayevin oğurlanma faktını hər vasitə ilə ört-basdır etməyə çalışan vəzifəli şəxsləri gördük, mənfi tendesiyalar üstün şəkil aldı. Məhkəmə sistemində çalışan hakim, güc strukturlarında xidməti vəzifələrini ”yerinə yetirən” onlarla zabitlər hər biri ayrı-ayrı qruplaşmaların nümayəndələri kimi, “pul verin, Mahiri gətirək” təklifləri ilə çıxış ediblər. Bu bir daha göstərir ki, heç bir halda bunları adi Azərbaycan vətandaşlarının təhlükəsizliyi maraqlandırmır. Çirkin cinayət yoluyla külli miqdarda mənfəət əldə etməkdir bunları maraqlandıran”.
Azad Mürsəliyev Mahir Abdullayevlə bağlı cinayətin açılması üçün dövlət başçısının göstəriş verməsini və bu işi nəzarətə götürməsini istəyir.
Informasiya şöbəsi