Yağan intensiv yağışlar Cəlilabadda bir sıra fəsadlar törədib. Rayon mərkəzindən keçən Mişarçay çayı üzərindəki sututarda suyun səviyyəsi maksimum həddə çatıb.
Ərazidəki bəndin dağılma təhlükəsi yarandığı üçün qabaqlayıcı tədbirlər görülür.
Su axınını təmin edən alternativ kanal körpünün qarşısında qazıldığı üçün Petrovka adlanan yaşayış məntəqəsinin rayon mərkəzi ilə əlaqəsi tamam kəsilib.
Mişarçay çayının məcrasından çıxması səbəbindən bir sıra iaşə obyekti su altında qalıb. Hazırda rayonun müvafiq qurumları selin qarşısını almaq üçün ağır texnikanın köməyi ilə qabaqlayıcı tədbirlər görür. (APA)
***
Azərbaycanın cənub bölgəsində intensiv yağan yağışlar Masallı rayonunda subasmaya səbəb olub.
Rayonun Böyük Təklə kəndində 40-a yaxın yaşayış evinin ərazisi su altında qalıb.
Kənd sakinlərinin bildirdiyinə görə, bəzi ərazilərdə suyun səviyyəsi 0,5 metrdən 1,5 metrə qədərdir. Bu barədə rayon rəsmilərinə və Fövqəladə Hallar Nazirliyinin (FHN) Cənub Regional Mərkəzinə də məlumat verilib. Subasmaya səbəb isə Göytəpə və Yazqıraq çaylarının kəndin arxa hissəsindən bir-birinə qovuşaraq daşması olub. Sakinlər eyni səbəbdən dəfələrlə həyətlərinin və əkin sahələrinin su altında qalması və təsərrüfatlarına dəyən ziyanla bağlı narahatlıqlarını ifadə ediblər.
Masallı Rayon İcra Hakimiyyətinin fövqəladə hallar komissiyasına ötən illərdə edilən müraciətlərdən sonra texnika göndərilərək müvəqqəti olaraq problemi aradan qaldırmaq mümkün olsa da, ancaq bu yetərli olmayıb. Bu il yenidən 37 ailənin 15 ildir məskunlaşdığı yeni massivdə eyni problem yaşanır. (Report)