“The Daily Telegraph” qəzetinin elm üzrə redaktoru Sarah Knapton yazır ki, sinif otaqlarında nadinclik edən uşaqların beyin anormallığına malik olması ehtimalı irəli sürülüb.
Bundan əvvəl uşaq dəcəlliyi yaşın şıltağı kimi qəbul olunurdu.
Knapton yazır ki, Britaniyada 5-16 yaşları arasında olan hər 20 uşaqdan biri davranış qüsuru deyilən anormallıqdan əzab çəkir.
Bu uşaqlar aqressivlik, zorakılıq, yalançılıq, oğurluq və silahlardan istifadə kimi davranış pozuntuları nümayiş etdirirlər.
Məqalədə deyilir ki, yeni araşdırma davranış qüsuruna malik uşaqlarda beynin ön və gicgah hissələrində qalınlaşma müşahidə olunduğunu göstərib.
Araşdırma həmçinin bu diaqnozun erkən və sonrakı mərhələlərində olan uşaqların beyinlərindəki fərqləri də nümayiş etdirib.
Southampton Universiteti psixologiya kafedrasının müdiri doktor Graeme Fairchild deyib ki, sağlam uşaqlarla davranış probleminə malik olanlar arasındakı fərqlər bütün beyin nahiyələrində müşahidə olunur, lakin bu fərqlər ön beyin və gicgah hissələrdə daha qabarıq görünür.
“Bu onu təsdiq edir ki, davranış qüsuru bəzi ekspertlərin iddia etdiyi kimi şişirdilmiş uşaq üsyankarlığı yox, psixiatarik pozuntudur, – deyib alim, – İndi belə uşaqlara klinik şəkildə köməklik göstərilməsi istiqamətində daha çox araşdırmanın aparılmasına ehtiyac var”.
Nadincliyin müalicəsi?
Alimlər davranış qüsuru olan 16-21 yaşları arasında 58 gənc və uşaq , habelə bu qüsurun tipik daşıyıcısı olan 25 nəfər üzərində araşdırma aparıblar.
Əldə edilmiş faktlar sonradan 13-18 yaşları arasında davranış qüsuru olan 37 və “sağlam” olan 32 uşaq və gənclərdən alınan məlumatlarla tutuşdurulub.
Beyin qalınlaşmalarının öyrənilməsi məqsədilə maqnit-rezonans təsvirləmə metodundan istifadə olunub.
Bəlli olub ki, davranışında nadinclik olan azyaşlı uşaqlarla, sakit uşaqların beyin təsvirləri arasında heç bir fərq olmadığı halda, daha böyük yeniyetmə yaşlarında fərqlər aşkar müşahidə olunur.
Bu onu göstərir ki, davranış qüsurunun vizual beyin göstəricələri əvvəl-əvvəl görünməyə də bilər.
Məhz bu məqamdan çıxış edən Cambridge Universitetinin professoru Ian Goodyer deyib ki, alimlər hazırda beyindəki qalınlaşma prosesini geri döndərməyin mümkünlüyü üzərində işləyirlər.
Əgər bu baş tutarsa, uşaqlardakı beyin qüsurunun qarşısı psixoloji terapiya və ya başqa müdaxilələrlə alına bilər. (BBC azeri)